Qeveria shqiptare ka rikthyer idenë e krijimit të një rezerve shtetërore për naftën, e cila do të shërbente për furnizimin e popullatës në raste emergjente. Projektligji i publikuar për konsultim parashikon që rezervat të mbulojnë konsum brut të naftës për të paktën 90 ditë, me një kosto minimale prej 520 milion euro nëse do të ndërtohen depozitat ose rreth 300 milion euro nëse ato qiren.
Sipas ligjit, shuma e rezervave duhet të përmbushë të paktën 90 ditë të sasive mesatare ditore të importeve, ose 61 ditë të konsumit të brendshëm, cili do të ishte më i lartë. Ekspertët e tregut sugjerojnë se për të arritur këto rezervat minimale, do të nevojiten 270-300 mijë ton karburant, me një kosto të tregut prej 300 milion dollarë ose 260 milion euro.
Megjithatë, kostoja e produktit është vetëm një pjesë e shpenzimeve. Ruajtja e karburantit do të kërkonte shpenzime të tjera, përfshirë marrjen me qira të depozitave, që sipas ekspertëve nuk janë të disponueshme. Edhe nëse do të ishin, kostoja e qirasë për një kapacitet 300 mijë ton do të arrinte rreth 3 milion euro në muaj, ose 36 milion euro në vit.
Kështu, nëse përllogaritet gjitha shpenzimet, projekti i rezervave mund të arrijë deri në 300 milion euro, pa pasur parasysh kostot e pagave dhe energjisë elektrike. Nëse qeveria vendos të ndërtojë depozitat, kjo do t’i kushtonte rreth 300 milion dollarë ose 260 milion euro, duke e çuar totalin në rreth 520 milion euro.
Për të mbuluar këtë kosto, projektligji parashikon burime financimi nga kredi, buxheti i shtetit dhe një tarifë e re që do të ngarkohet në xhepat e qytetarëve. Kjo tarifë do të aplikojë mbi produktet energjetike dhe do të shtohet në shumë prej taksave dhe tarifave ekzistuese që qytetarët paguajnë për karburantet, si akciza dhe taksa e qarkullimit, të cilat janë gjithashtu të shumta. Sasia e kësaj tarife të re do të përcaktohet pas miratimit të ligjit nga Këshilli i Ministrave.
