Deputeti i Partisë Demokratike, Agron Gjekmarkaj, zhvilloi një takim me ambasadoren zvicerane në Tiranë, Ruth Huber. Në një postim në rrjetet sociale, ai theksoi nevojën për të diskutuar mbi problematikat aktuale në Kuvend dhe mbi zgjedhjet e planifikuara për 11 majin.
Gjekmarkaj, si Nënkryetar i Kuvendit, e vlerësoi mbështetjen e vazhdueshme të Zvicrës për Shqipërinë, veçanërisht në forcimin e institucioneve demokratike. Ai kërkoi që ky bashkëpunim të vazhdojë në mënyrë që shteti shqiptar të rikthehet në rrugën e demokracisë dhe sundimit të ligjit.
Sipas tij, situata politike në vend është shqetësuese, sidomos në lidhje me procesin zgjedhor, që ai e quajti një “farsë elektorale”. Ai kritikoi veprimet e drejtësisë që, sipas tij, kanë penguar lidershipin opozitar gjatë periudhës së vitit elektoral, duke përmendur arrestimin e Sali Berishës dhe të deputetëve të tjerë si Ervin Salianji. Këto veprime, sipas Gjekmarkajt, kanë dëmtuar rëndë balancën demokratike në vend dhe kanë ndikuar në rezultatin e zgjedhjeve.
Ai gjithashtu shprehu shqetësim për mohim e të drejtës së opozitës për të shprehur mendimin e saj në Kuvend, duke theksuar se parlamenti ka kaluar në një situatë njëngjyrëshe, ku vetëm mazhoranca e udhëheq punimet. Gjekmarkaj e quajti këtë situatë një pengmarrje të Kuvendit.
Në përfundim, ai kërkoi që diplomatët perëndimorë në Shqipëri të lehtësojnë komunikimin mbi dhimbjet dhe sfidat me të cilat po përballet demokracia shqiptare, duke mos heshtur përballë deformimeve serioze të sistemit politik dhe parlamentar.
