Presidenti i Serbisë, Aleksandar Vuçiç, kritikoi vizitën e një delegacioni të Parlamentit Evropian në Beograd, duke e quajtur takimin me opozitën një nga “më qesharakët në botë”. Në një intervistë për TV Prva, Vuçiç shprehu zhgënjim se athua politikanët e tij ishin më shumë të fokusuar në eurodeputetët, të cilët i përshkroi si njerëz “krejtësisht të parëndësishëm”.
Ai akuzoi opozitën se bënte hamendësime të këqija për Serbinë përpara delegacionit, ndërsa e quajti të “pacipë” kërkesën e opozitës për vendosjen e sanksioneve ndaj partisë në pushtet, Partisë Progresive Serbe (SNS). Delegacioni, i udhëhequr nga eurodeputetja portugeze Marta Temido, vizitoi Beogradin nga 22 deri më 24 janar dhe nuk u takua me Vuçiçin apo kryeparlamentaren Ana Bërnabiç, të cilët ishin jashtë vendit.
Më herët, Vuçiç dhe Bërnabiç kishin shprehur se nuk dëshironin të takoheshin me eurodeputetët, duke pretenduar se nuk ishin njoftuar për mbërritjen e tyre. Kjo akuzë u mohua nga Parlamenti Evropian. Gjatë vizitës së tyre, anëtarët e delegacionit u takuan me përfaqësues të Qeverisë serbe, disa politikanë opozitarë, media, sektorin civil dhe komunitetin akademik.
Përfaqësuesit e opozitës proevropiane kërkuan nga delegacioni që të ridrejtojnë fondet nga Plani i Rritjes së BE-së për Ballkanin Perëndimor, në mbështetje të organizatave të shoqërisë civile dhe mediave që punojnë për të drejtat dhe liritë themelore të njeriut. Po ashtu, ata kërkuan sanksione individuale për anëtarë të SNS dhe të tjerë.
Vizita e delegacionit erdhi tre muaj pas miratimit të një Rezolute në Parlamentin Evropian, që trajton polarizimin dhe shtypjen në Serbi, një vit pas incidentit tragjik në Novi Sad, që rezultoi me 16 të vdekur. Pas vizitës në Beograd, raporti i eurodeputetëve do të paraqitet një komisioni në Parlamentin Evropian.
