Karabinierët italianë kanë realizuar një operacion antidrogë në Romë, ku sekuestruan një sasi rekord prej 200 kilogramësh kokainë dhe arrestuan Kristianin, një 22-vjeçar shqiptar. Kokaina, me një vlerë prej rreth 16 milionë eurosh, ishte e ndarë në 191 pako dhe e fshehur në vende të ndryshme brenda apartamentit të tij në Tor Vergata.
Gjatë bastisjes, u gjetën gjithashtu 30,000 euro para të gatshme dhe një armë zjarri e vjedhur. Autoritetet konstatuan se apartamenti shërbente si qendër shpërndarjeje droge, i pajisur me elemente logjistikë të avancuar për ruajtjen dhe shpërndarjen e narkotikëve. Kristiani u arrestua jashtë banesës pasi sjellja e tij ngjalli dyshime te patrulla e karabinierëve; ai kishte një shumë të konsiderueshme parash me vete, ndonëse ishte i papunë.
Hetuesit zbuluan gjithashtu se Kristiani kishte modifikuar makinën e tij duke i shtuar një vend të fshehtë, që hapej me një tastierë me kod, në një përpjekje për të shmangur kontrollin gjatë transportimit të drogës. Gjatë seancës së parë gjyqësore, ai pranoi përfshirjen e tij në aktivitetin kriminal, duke argumentuar se kjo ndodhi për shkak të kushteve të vështira ekonomike të familjes së tij.
“U përfshiva në një situatë të gabuar sepse familja ime është shumë e varfër,” tha ai para gjykatës, sipas raportimeve. Kristiani deklaroi se po kthehej në Shqipëri në momentin e ndalimit dhe se ishte hera e parë që merrte pjesë në aktivitet të tillë. Sa i përket armës, ai e hodhi poshtë pronësinë, duke thënë se nuk e kishte blerë dhe se nuk e kishte përdorur ndonjëherë.
Ai refuzoi të ofronte informacion lidhur me rrjetin kriminal që fshihej pas kësaj sasi të madhe narkotikësh. Gjyqtari vendosi masën e arrestit me burg, ndërsa avokatja e tij, Dalila Milano, njoftoi përgatitjen e një ankimi në Gjykatën e Apelit për një masë më të butë sigurie.
