Një tjetër projekt i Ministrisë së Infrastrukturës ka ndezur zemërimin e qytetarëve. Në qendër të akuzave është zëvendëskryeministrja dhe ministrja e Infrastrukturës, Belinda Balluku, e cila, sipas dokumenteve dhe hartave të publikuara, ka ndërtuar një mbikalim të dedikuar vetëm për pallatet dhe pronat e oligarkut Samir Mane, duke lënë pa akses dhe lidhje banorët e zonave Yrshek dhe Laknas.
Fotot dhe skicat e projektit tregojnë qartë se mbikalimi nuk shërben për komunitetin, por për t’i mundësuar komplekseve të Manes akses të drejtpërdrejtë me autostradën Tiranë-Durrës. Ndërkohë, rrugët që lidhin lagjet përreth mbeten të papërfunduara dhe pa dalje në rrugën kryesore.
Sipas dokumentacionit, hyrjet dhe daljeve të mbikalimit janë projektuar për pronën private të Manes, ndërsa banorët e Yrshekut mbeten të izoluar, pa ndonjë lidhje funksionale me infrastrukturën publike.
Ky zhvillim ka nxitur akuza të forta për favorizim të interesave të oligarkëve nga qeveria. “Kjo është një provë tjetër që tregon se kjo qeveri punon vetëm për oligarkët dhe jo për qytetarët”, thuhet në reagimet e para nga burime të afërta me komunitetin lokal.
Samir Mane, i njohur si një ndër biznesmenët më të fuqishëm dhe më të afërt me pushtetin, duket se përfiton përsëri nga investimet publike. Çdo projekt i tij, sipas kritikëve, shoqërohet me ndërhyrje të drejtpërdrejta të qeverisë për të përmirësuar infrastrukturën rreth pronave të tij, ndërsa nevojat e komuniteteve lokale shpërfillen plotësisht.
Banorët kërkojnë transparencë të plotë mbi projektin, publikimin e dokumenteve zyrtare, dhe llogaridhënie për mënyrën sesi fondet publike po përdoren për të ndërtuar infrastrukturë që i shërben vetëm një biznesmeni.
“Ky nuk është mbikalim për qytetarët, është rrugë për oligarkët dhe pengesë për qytetarët,” shprehen banorët.
