Florian Haçkaj, menaxher komercial i kibernetikës ka folur lidhur me sulmet kibernetike dhe rrjedhjen e të dhënave. Ai deklaron se e gjithë kjo tregon qartë rënien e shtetit dhe se kjo është një çështje e ndjeshme pasi ka të bëjë me të dhënat personale të qytetarëve dhe vetë shtetin.
Sipas tij, duhet ribërë një grup ekspertësh pa përfshirje partiake sepse është qeveria ajo që ka bërë këtë lëmsh ku ne ndodhemi sot, ndërsa sugjeroi qytetarët se duhet të jenë ata të parët që të kërkojnë mjete identifikimi të reja.
“Për fat të keq dolën shumë gjëra nga raporti, kjo është totalisht rënia e shtetit. AKSHI është sipërfaqja ndërvepruese me qytetarin dhe nëse ato kanë dalë, tregon që është shteti i rënë. Është çështje e ndjeshme sepse ka të bëjë me të dhënat personale. E kam shprehur qëkur kanë dalë të dhënat me patronazhistët ka pasur indicie të qarta se ka pasur porta të hapura në sistemet e AKSHI-t, por një diçka që e kam këshilluar atëherë duhet të shihet se deri ku ka shkuar dëmi. Ne sot ende e kemi e-albania online. Nëse është bërë një back up për ta vënë sa më shpejt e-albania në përdorim i bie që dhe ai back up të jetë i dëmshëm. Duhet sa më shpejt një ekip ekspertësh jopartiak, sepse është qeveria ajo që ka bërë këtë lëmsh ku ne ndodhemi sot sepse çdo e dhënë e jona është në treg. Çdo sulm dhe rrezik është i mundshëm fatkeqësisht me këto të dhëna që kanë në dorë. Sot shteti shqiptar ka për detyrë të ribëjë kartat e identitetit të reja, edhe pasaportat me numër të ri për qytetarët.” tha Haçkaj për MCN.
I pyetur se cilat janë përshkallëzimet që mund të ndodhin, dhe si mund të mbrohemi ne si individë dhe të dhënat tona, Haçkaj tha se fatkeqësisht sot nuk kemi mundësi për të bërë asgjë.
