Në Suedi, policia ka nisur hetimet për disa ngjarje të rënda kriminale, përfshirë të shtëna me armë dhe një komplot të dyshuar për shantazh, të cilat mund të jenë të lidhura me transferimin e sulmuesit Viktor Gyokeres te Arsenali për 64 milionë paund.
Incidentet janë regjistruar në Huddinge, afër Stokholmit, ku dyshohet se objektivi ka qenë një i afërm i një agjenti të përfshirë në marrëveshjen e transferimit. Raportohet se ky i afërm është mburrur për përfitimet financiare që ka marrë nga marrëveshja, duke përmendur se i është ndarë një pjesë e rëndësishme e tarifës së nënshkrimit. Kjo mund të ketë provokuar një përpjekje për shantazh ndaj tij.
Policia suedeze ka konfirmuar se është duke shqyrtuar mundësinë që këto incidente me armë janë të lidhura me një përpjekje për të siguruar para në mënyrë të paligjshme. Për fat të mirë, askush nuk është lënduar nga të shtënat, por autoritetet e trajtojnë situatën me seriozitet për shkak të lidhjeve të mundshme me krimin e organizuar, sidomos në kontekstin e industrisë së futbollit, e cila është bërë një objektiv në rritje për grupet kriminale.
Frederico Varandas, presidenti i Sporting Lisbonës, klubi i mëparshëm i Gyokeres, theksoi se “shantazhet dhe fyerjet” nuk do e sillnin klubin të pranonte ndonjë marrëveshje që është jashtë interesave të tij. Ndërkaq, agjenti i sulmuesit suedez nuk konfirmoi ose mohoi ndonjë përfshirje në një skemë shantazhi, por e përshkroi industrinë si të ndjeshme, ku ndodhin edhe ngjarje të tilla.
Policia suedeze, në një kohë kur po përballet me një rritje të krimeve të bandave, ka vënë në dukje se organizatat kriminale po synojnë gjithnjë e më shumë agjencitë e futbollit për shkak të shumave të mëdha financiare që qarkullojnë në këtë sektor. Hetimet vazhdojnë, megjithatë nuk ka ende konfirmim të drejtpërdrejtë për lidhjen ndërmjet incidentit dhe transferimit të Gyokeres.
