Stuhia Benjamin goditi Europën Perëndimore më 23 tetor, duke shkaktuar përmbytje dhe shkatërrime nga Anglia jugore deri në Korsikë. Erëra të fuqishme, që tejkalonin 100 km/orë dhe shi të pandërprerë, shkaktuan ndërprerje të energjisë, rrëzim pemësh dhe probleme të mëdha të udhëtimit, duke detyruar autoritetet të ishin në gatishmëri.
Në Mbretërinë e Bashkuar, juglindja ishte më e goditura, ku një pemë ra mbi një qendër argëtimi në Sheerness dhe ishin lëshuar paralajmërime për përmbytje në Kent, Surrey dhe Sussex. Disa lumenj dolën nga shtrati, duke shkaktuar përmbytje të mëdha, ndërsa transporti u ndërpre, me DFDS që raportoi anulime dhe vonesa për linjat me Francën. Autoritetet paralajmëruan shoferët të shmangin rrugët e përmbytura.
Në Francë, shërbimi meteorologjik lëshoi paralajmërime portokalli për gjashtë rajone, pasi erërat arritën deri në 130 km/orë. Rrethet bregdetare si Bretanja dhe Normandi përballeshin me valë të forta, ndërsa urat dhe parqet u mbyllën si masë paraprake. Edhe pse rajoni i Parisit nuk u prek shumë, autoritetet iu bënë thirrje banorëve të shmangin udhëtimet për të evituar rreziqet nga rëniet e pemëve. Si pasojë e stuhisë, rreth 60,000 familje mbetën pa energji elektrike.
Korsika përjetoi tragjedinë më të rëndë, ku një burrë 45-vjeçar humbi jetën pasi u rrëmbye nga një përrua, ndërsa gruaja dhe dy vajzat e tij u shpëtuan. Erëra deri në 130 km/orë goditën ishullin, duke paralizuar lidhjet ajrore dhe të trageteve.
Mot i keq u raportua edhe në Belgjikë dhe Holandë, me reshje të dendura shiu dhe përmbytje, që shkaktuan dëmtime në infrastrukturë dhe vonesa në fluturime. Ndërsa stuhia Benjamin lëvizte drejt lindjes, intensiteti i saj filloi të bjerë.
