Një studim i ri nga shkencëtarët në Nju Jork sugjeron se prekja, që tradicionalisht konsiderohet si shprehje e butësisë dhe afrimitetit, mund të përdoret si mjet manipulimi nga individë me tipare të errëta personaliteti, përfshirë psikopatinë, narcizmin dhe makiavelianizmin. Sipas kërkimeve, prekja mund të rrisë ndjenjën e pronësisë ndaj njerëzve dhe të nxisë bindjen në marrëdhëniet romantike.
Profesori Richard Matson, autor i studimit, thekson se jo të gjitha format e prekjes janë dashamirëse dhe se ato mund të shfrytëzohen për të ushtruar kontroll mbi partnerët. Gjestet si mbajtja e krahut ose prekja e shpatullës gjatë një debati mund të jenë shenja që mashtrojnë për qëllime egoiste.
Studiuesit e këtij hulumtimi, që përfshiu 500 studentë mbi 18 vjeç që ishin në marrëdhënie, theksuan se burrat dhe gratë me këto karakteristika kanë më shumë gjasa të përdorin prekjen si mjet manipulimi, ndonëse mënyrat e tyre ndryshonin sipas gjinisë. Burrat që ndihen të pasigurt kanë tendencë të përdorin “prekjen kompulsive” për të siguruar vëmendjen e partnerëve, ndërsa gratë e shfrytëzojnë prekjen për të fituar kontroll, edhe nëse ndihen të pakëndshme me të.
Interesant është se gratë që kanë ankth të lartë lidhjeje tregojnë një neveri të madhe ndaj prekjes, pavarësisht se e përdorin atë për të rritur fuqinë ndërpersonale. Kërkimi tregon se tiparet e “Triadës së Errët” lidhen shpesh me vështirësi në marrëdhëniet, duke shkaktuar debate të shpeshta dhe madje dhunë.
Këtë studim, i botuar në revistën Current Psychology, konsiderohet si i pari që tregon një lidhje të drejtpërdrejtë midis tipareve të errëta dhe përdorimit të prekjes për qëllime manipulative. Studiuesit rekomandojnë që individët të jenë të vëmendshëm ndaj shenjave të mundshme dhe dinamikave në marrëdhëniet e tyre.
