Aplikacionet e inteligjencës artificiale si ChatGPT përballen me kritika për saktësinë e informacionit që ofrojnë. Një studim i publikuar nga rrjetet publike evropiane të radios dhe televizionit zbulon se këto aplikacione bëjnë gabime gati një herë në dy kur trajtojnë ngjarjet aktuale. Testi, i realizuar në katër platforma të njohura: ChatGPT, Copilot, Gemini, dhe Perplexity, ka zbuluar se 45% e përgjigjeve kishin “të paktën një problem të rëndësishëm”, me një në pesë përgjigje që përmbanin “gabime të mëdha”.
Gemini, aplikacioni nga Google, doli të ishte më i dobëti, me “probleme të rëndësishme” në 75% të përgjigjeve, duke e tejkaluar ndjeshëm përformancën e aplikacioneve të tjera. Studimi u realizua nga një konsorcium prej 22 mediash publike në 18 vende evropiane, që testuan saktësinë e përgjigjeve midis fund majit dhe fillimit të qershorit.
Një nga problemet më të zakonshme ishte informacioni i vjetëruar. Për shembull, përgjigjja e ChatGPT për pyetjen “Kush është Papa?” e identifikoi atë si Françesku, kur në të vërtetë, pasardhësi i tij, Leo XIV, kishte marrë detyrën. Po ashtu, Gemini përdori informacion të pasaktë kur u pyet për një ngjarje në Shtetet e Bashkuara.
Studimi përfundon se “asistentët e inteligjencës artificiale ende nuk janë një mënyrë e besueshme për të konsumuar informacion”, sipas Jean-Philippe De Tedder dhe Pete Archer nga UER dhe BBC. Megjithatë, përdorimi i këtyre aplikacioneve po rritet, sidomos mes të rinjve; sipas një raporti të Institutit Reuters, 15% e individëve nën 25 vjeç i përdorin ato çdo javë për të marrë informacione mbi ngjarjet aktuale.
Ky studim, siç deklaroi Mathieu Beauval nga Radio France, është i pari i këtij lloji dhe hedh dritë mbi nevojën për vlerësim kritik të informacionit të ofruar nga inteligjenca artificiale.
