Pas pezullimit të volejbollistes braziliane Nayara Ferreira nga klubi Dinamo, ky i fundit ka reaguar me një komunikatë zyrtare. Klubi konfirmon se ka marrë njohuri për vendimin e Federatës Shqiptare të Volejbollit (FSHV) për pezullim dhe për kërkesën e zhvillimit të një testi për përcaktimin e gjinisë.
Në komunikatë, klubi thekson angazhimin e tij ndaj zbatimit të rregullave dhe standardeve të sportit, duke respektuar parimet e fair play. Nayara Ferreira, një sportiste me një karrierë 15-vjeçare dhe me licencë nga FIVB, nuk është informuar për arsyet konkrete dhe bazën rregullative që justifikojnë këtë vendim, i cili është i papritur për klubin.
Reagimi i klubit shpreh shqetësim për mungesën e transparencës nga ana e FSHV-së, duke theksuar se kërkesa për testimin e saj prek dinjitetin dhe integritetin personal të sportistes. Klubi konsideron se ka vend për paqartësi në trajtimin e kësaj çështjeje dhe mbi standardet që duhen respektuar në sportin modern.
Megjithatë, Dinamo ka shprehur angazhim për të bashkëpunuar me FSHV-në dhe dëshiron të trajtojë rastin me kujdes, duke njohur ndjeshmërinë e tij njerëzore dhe profesionale. Klubi nënvizon rëndësinë e transparencës, drejtësisë dhe respektit për individët në sport, duke besuar se sporti duhet të bashkojë dhe të mos poshtërojë.
Dinamo deklaron se do të vazhdojë të mbrojë këto vlera dhe të qëndrojë në anën e të drejtës, duke e bërë këtë situatë një përpjekje për të ruajtur dinjitetin njerëzor në sport. Kjo cështje, sipas klubit, shprehn nevojën për reflektim mbi mënyrën se si trajtohen rastet e ngjashme në të ardhmen.
