Një hetim i fundit nga London Times zbulon një fenomen të ri të spiunazhit, i njohur si “lufta seksuale”, ku shërbimet e inteligjencës nga Kina dhe Rusia shfrytëzojnë gra tërheqëse për të joshur drejtues dhe inxhinierë të kompanive amerikane të teknologjisë. Këto agjente, të cilat përdoren për “kurthe mjalti”, janë të trajnuara për të fituar besimin e individëve me akses në të dhëna të ndjeshme, duke synuar të sigurojnë informacion të klasifikuar dhe ta transferojnë jashtë vendit.
Pika kryesore e strategjisë është krijimi i lidhjeve përmes kanaleve dixhitale, si LinkedIn, ose nëpërmjet takimeve ballë për ballë, duke u paraqitur si sipërmarrës, investitorë ose studiues me interesa për bashkëpunim. Ky fenomen ka evoluar dhe tani agjentët sjellin në skenë një qasje më të sofistikuar, duke vepruar si profesionistë të zakonshëm, të cilët është e vështirë t’i identifikosh si pjesë të operacioneve spiunazhi.
Sipas hetimit, dëmi ekonomik nga vjedhja e pronës intelektuale dhe teknologjive të ndjeshme është i konsiderueshëm, duke arritur në miliona dollarë për Shtetet e Bashkuara çdo vit. Ekzistojnë vlerësime që tregojnë se spiunazhi ekonomik i fuqive të huaja kushton rreth 600 miliardë dollarë në vit. Operacionet e “luftës seksuale” janë parë si një pjesë e një plani më të gjerë, që përfshin gjithashtu hakerimin dhe investime në kompani fasadë, të gjitha me qëllimin për të minuar pozitat dominues në teknologji.
Kjo nuk është hera e parë që agjencitë perëndimore të intelijencës paralajmërojnë për këto operacione. Dy vjet më parë, shërbimet qeveritare amerikane dhe britanike ngritën alarmin për similaritete në një varg “kurthesh mjalti” që synonin zyrtarët dhe studiuesit në fushën e mbrojtjes. Sipas analistëve, këto raporte reflektuan vazhdimësinë e kësaj forme lufte, duke sugjeruar se teknikat tradicionale të spiunazhit janë përshtatur me teknologjitë moderne, duke krijuar një mjedis të ri për manipulim dhe strategji në epokën dixhitale.
