Kryeministri spanjoll, Pedro Sanchez, njoftoi krijimin e një rrjeti mbarëkombëtar të “strehëzave klimatike” për të mbrojtur popullsinë nga valët e nxehtit, pas një rritjeje të ndjeshme të temperaturave. Në një konferencë shtypi në Madrid, ai theksoi se Spanja ka përjetuar verëra me valë të nxehti gjithnjë e më të zgjatura dhe shira të rrëmbyeshëm në vjeshtë, fenomene që lidhen me efektin serë të shkaktuar nga aktiviteti njerëzor.
Sanchez përshkroi situatën si një “realitet të ri” me thatësira “katastrofike” që janë bërë më të shpeshta dhe intensive. Ai njoftoi plane për të hapur strehimoret para verës së ardhshme, duke theksuar se qëllimi kryesor është t’u ofrohen ndërtesat publike qytetarëve. Përveç kësaj, qeveria do të lehtësojë financimin për krijimin e strehimoreve në lagjet më vulnerabël, ku nxehtësia është më e forte.
Qeveria spanjolle, përmes këtij projekti, do të bashkëpunojë me autoritetet rajonale që kanë filluar tashmë iniciativa si këto, për shembull në Vendin Bask dhe Katalonjë. Duke qenë se Spanja ka një sistem të decentralizuar qeverisës, rajonet janë përgjegjëse për menaxhimin e emergjencave, përfshirë ato klimatike. Barcelona është një nga qytetet e pakta që ka strehimore klimatike, shumica e të cilave ndodhen në biblioteka, shkolla dhe ndërtesa publike me ajër të kondicionuar.
Viti 2025 shënoi temperaturat më të larta të regjistruara ndonjëherë në Spanjë, me mesataren prej 24.2°C, sipas agjencisë së meteorologjisë Aemet. Sipas Ministrisë së Shëndetësisë, nga 16 maji deri më 30 shtator, 3,832 vdekje mund të atribuohen nxehtësisë.
Me këtë nismë, qeveria spanjolle synon të adresojë krizën klimatike që po e preokupon vendin dhe të mbrojë popullsinë nga pasojat e ndryshimeve klimatike, në një kohë kur këto fenomene po rriten me intensitet.
