Një operacion i madh është duke u zhvilluar në këto momente në fshatin Fratar të Fierit dhe në një magazinë pranë Tiranës. Kështu raportojnë mediat malazeze, të cilat bëjnë me dije se në bashkëpunim me SPAK dhe DEA-n amerikane është zbuluar një laborator droge në Shqipëri.
Mësohet se të paktën 15 persona kanë rënë në prangat e Policisë Shqiptare, pas informacioneve të marra nga homologët në Malin e Zi, shkruan newsbomb.al. I gjithë operacioni lidhet me një sasi të madhe kokaine që arriti në Portin e Tivarit në muajin korrik.
Ngarkesa është nisur më pas drejt vendit tonë, e futur në 400 kg thasë me pleh kimik, dhe menjëherë autoritetet kanë nisur hetimet duke u koordinuar me homologët shqiptarë të SPAK. Është pritur për pesë muaj dhe laboratori i drogës në fshatin Fratar të Fierit është mbajtur nën vëzhgim, derisa aty të mbërrinte porositësi i drogës.
Menjëherë sapo ky person, emri i të cilit nuk bëhet me dije, ka mbërritur pranë vendit që mbahej nën vëzhgim me urdhër të Prokurorisë Speciale, është ndërhyrë dhe ai është arrestuar në kushtet e flagrancës.
Media malazeze “Vijesti” raporton se Inspektorët e Sektorit Kundër Krimit atëherë, në bashkëpunim me Prokurorinë e Lartë të Shtetit dhe kolegë nga Shqipëria kanë vlerësuar që magazina të mbahej nën vëzhgim dhe të kapnin në flagrancë porositësin e kokainës. “Kjo ka ndodhur sot”, shkruan media në fjalë.
Newsbomb.al raporton se në afërsi të Tiranës është duke u kontrolluar një magazinë në pronësi të një prej personave të arrestuar. Droga ishte fshehur në thasë me plehra kimik dhe subjektet që ushtrojnë këtë veprimtari në jug të Shqipërisë janë të shumtë.
Në orët në vazhdim, pritet që Policia dhe Prokuroria Speciale SPAK të japin informacion zyrtar për operacionin.
