Kreu i SPAK-ut, Altin Dumani deklaroi sot se hetimet për inceneratorin e Tiranës vijojnë dhe se dosja nuk është copëtuar në fraksione. Por Sali Berisha reagoi ashpër duke thënë se SPAK-u e ndau dosjen për të shpëtuar ministrat dhe zyrtarët e tjerë nga akuza e grupit të strukturuar kriminal. Për Dumanin tha se nuk ka informacione veç se “është majtist i pakorrigjueshëm”.
“Ky Dumani është një majtist i pa korrigjueshëm. Nuk kam të dhëna të tjera, por majtizmi i tij është i pakorrigjueshëm. Nuk mund të pranojë që qeveria e partisë së tij të shpallet organizatë kriminale. Dosja e inceneratorëve për cdo njeri normal kryetar ka Edi Ramën, zv ka Engjëll Agacin, Erion Veliajn pas Ramës dhe të tjerët.
Por kjo nuk mund të ndodhë. Partia e Rilindjes nuk mund të jetë organizatë kriminale prandaj e copëzojnë. SPAK është institucion politik, zhvatës, gjobëvënës që përdoret për ambiciet politike të Edi Ramës. Sepse ndryshe nuk mund të kuptohet amnistia e dytë e Ilir Beqjat” tha ai.
