Mbrëmjen e datës 15 Janar 2026, pas përfundimit të punës, persona nga stafi vëzhgues njoftuan pronarët e një Qendre Thirrjesh për një ndërhyrje të mundshme. Si pasojë, në orët e para të mëngjesit të datës 16 Janar, ambienti u boshatis dhe pajisjet u larguan. Hetuesit e BKH-së, duke zbatuar vendimin e Gjykatës së Posaçme, konstatuan boshatisjen e Qendrës dhe zhdukjen e pajisjeve dhe personelit.
Veprimet e shpejta hetimore lejuan identifikimin e personave dhe automjeteve të përfshira në largimin e materialeve nga Qendra. Pas gjurmimit, hetuesit ndaluan disa individë që po transportonin pajisje kompjuterike drejt një ambienti të marrë me qira në “Downtown One”, në Bulevardin Bajram Curri.
Gjatë kontrollit të ndërtesës ku po shkonin këta individë, në katin e 5-të u zbulua një Qendër tjetër Thirrjesh në ndërtim e sipër. Aty u gjetën aparatura të shumta, përfshirë kompjuterë, telefona, hard disqe, laptopë, dhe dokumente të tjera. Ndërkohë, ata që ishin kapur në flagrancë ishin duke transportuar një kosh mbeturinash që përmbante sende të dyshuara të marrë nga Qendra Thirrjesh në rrugën “Ibrahim Rugova”, të cilat ishin duke i asgjësuar.
SPAK njofton se hetimet vazhdojnë. Lajmi është në përditësim.
