Opinion nga Timoni.al
Bashkim Ulaj, një nga emrat me histori të zezë korrupsioni dhe grabitje pronash është përfshirë në një projekt që ka shkaktuar zemërim dhe kundërshtime të forta nga banorët e zonës së Velipojës, Shkodër. Ky projekt, një resort luksoz i quajtur “Blue Borgo”, i cili ka marrë një status të veçantë nga qeveria për ndërtimin e një strukture akomoduese 5 yje, është i lidhur me akuzat për grabitjen e pronave dhe falsifikimin e dokumenteve nga ana e Ulajt dhe bashkëpunëtorëve të tij.
Sipas banorëve të fshatit Baks-Rrjoll, të cilët kanë jetuar dhe punuar në këtë zonë për shumë vite, ndërtimi i resortit të Ulajt ka sjellë një prekje të drejtpërdrejtë të pronës së tyre. Ata akuzojnë Bashkim Ulajn dhe Fatmir Shpellzajn për falsifikimin e dokumenteve dhe për përvetësimin e tokave që, sipas banorëve, kanë qenë të trashëguara për breza. Këta banorë thonë se kanë paraqitur prova ligjore, përfshirë vendime gjyqësore dhe dokumente kadastrale që vërtetojnë se ato toka janë të tyre, por akuzojnë se dokumentet janë manipuluar dhe falsifikuar në mënyrë të paligjshme. Këto akuza kanë çuar në ngritjen e një kallëzimi për këtë çështje pranë SPAK-ut.
Banorët e fshatit Rrjoll të njësisë adminstrative Velipojë, bashkia Shkodër, protestuan sot për të dytën ditë rradhazi kundër tentativës për marrje me dhunë të pronave të tyre me qëllim dhurimin e tyre oligarkut Bashkim Ulaj për ndërtim resortesh turistike dhe apartamentesh.
60 familje kërkojnë ndërprerjen e punimeve, ndërsa akuzojnë Ulajn se në bashkëpunim me Shpellzajn u kanë grabitur tokat duke falsifikuar dokumentet e pronësisë. Ata thonë se çështjen e kanë çuar në SPAK dhe kërkojnë ndërprerjen e punimeve deri në zgjidhjen e situatës së pronësisë.
“Këtu një njeri i panjohur fare, del dhe merr 1500 dynym tokë, si ka mundësi. Edhe të jetë tokë publike, shteti duhet ta shohë pse ka marrë 1500 dynym tokë. Ai nuk ekziston askund, del nga nëntoka, merr një pasuri që është e popullit. Policia, ne kemi respekt. Por nëse është e mundur që po mbrojnë atë zotërinë, të na mbrojnë edhe ne. Të ndalojnë punimet, të ulen rrafshit, të diskutojnë, të vijë ai zotëria që na ka marrë tokën, siç vi unë. Jam ballafaquar me atë dy herë, ai thotë e kam marrë tokën unë se më takon. I kam thënë eja të merresh vesh me njerëzit. Të ndalojnë punimet dhe të merremi vesh, ne nuk duam konflikt me policinë.
Banorët e Rrjollit, të cilët për mbi një shekull kanë jetuar aty dhe kanë dokumente mbi tokat, jo vetëm që nuk po dëmshpërblehen, por as nuk pyeten fare nëse diçka e tillë duhet ndërtuar aty. Me anë të pronarëve fiktivë, të panjohur, që gjoja kanë qenë pronarë të hershëm të tokës, po tentohet grabitja e tokave të banorëve të Rrjollit me qëllim pasurimin e mëtejshëm te oligarkëve dhe të politikanëve të korruptuar shërbëtorë të tyre.
Prej 2 javësh makineritë e ndërtimit janë sjellë në zonë për të filluar punimet, ndërkohë dy ditët e fundit ka patur reagime dhe protesta nga banorët të cilët kanë kërkuar me ngulm dhe me të drejtë ndërprerjen e punimeve. Pak kohë më parë ata kanë bërë edhe një padi në SPAK lidhur me këtë çështje dhe janë në pritje të një përgjigjeje.
Qeveria Rama, në vend që të mbrojë interesat e qytetarëve të thjeshtë, mbron interesat e oligarkut Bashkim Ulaj, të cilit edhe i shërben, duke sjellë forca të shumta policore dhe duke ushtruar dhunë e arrestuar banorët dhe pronarët legjitimë të tokës. Ky veprim i turpshëm dhe barbar nga ana e shtetit duhet të dënohet me forcë.
Pasi më parë qeveria kishte tentuar t’ia dhuronte biznesmenit Pëllumb Gjoka për një investim 52 milion euro, i shpallur në 2021 si investitor strategjik, dhe më pas i arrestuar në korrik 2024 nga SPAK nën akuzën për grup të strukturuar kriminal dhe vrasje, duket se këtë herë qeveria e korruptuar e Edi Ramës ka shkuar edhe një hap më tej, drejt e në rrënjët ekonomike të këtij sistemi të kalbur, duke i dhënë leje kompanisë Gener 2 me pronar biznesmenin oligark Bashkim Ulaj.
Kujtojmë edhe njëherë se Bashkim Ulaj është oligarku që ka marrë me koncension aksin Thumanë – Kashar për 35 vite, gjatë së cilës do të merren 1.3 miliardë euro, të siguruara nga shteti shqiptar, edhe pse investimi ishte vetëm 244 milionë euro. Njëkohësisht, ai njihet edhe për investimin korruptiv të 5 kullave te diga e Liqenit Artificial të Tiranës.
Në këtë kontekst, lind pyetja e drejtësisë dhe transparencës në trajtimin e rasteve të tilla, veçanërisht kur këto ndodhin në një kohë kur qeveria po ofron mbështetje të dukshme për investitorët dhe zhvillimin e projekteve të mëdha, përfshirë ato që lidhen me turizmin dhe ndërtimin e resorteve. Një pikë e rëndësishme është heshtja e SPAK, që deri më tani nuk ka dhënë ndonjë reagim të dukshëm për këtë çështje, pavarësisht akuzave të rëndësishme të falsifikimit dhe shkeljeve të pronës.
Pyetje për SPAK dhe autoritetet përgjegjëse:
1. Pse SPAK nuk ka reaguar ende ndaj kallëzimit të banorëve për grabitjen e pronave në Velipojë, duke përfshirë akuzat për falsifikimin e dokumenteve dhe zaptimin e paligjshëm të tokave?
2. A është e mundur që një investitor të marrë mbështetje shtetërore për një projekt turistik, ndërkohë që po përvetëson pronat e qytetarëve pa respektuar ligjin dhe pronësinë e tyre?
3. Çfarë mase do të ndërmarrë SPAK për të hetuar këto akuza dhe për të mbrojtur të drejtat e banorëve të prekur nga ky projekt, duke siguruar transparencë dhe drejtësi?
4. A është kjo heshtje e SPAK një tregues i lidhjeve mes biznesmenëve të fuqishëm dhe strukturave të pushtetit, duke favorizuar interesa private mbi të drejtat e qytetarëve?
5. Si mund të sigurohet që procesi i ndarjes së pronës dhe lejeve të ndërtimit të jetë më i qartë dhe më transparent, duke shmangur abuzimet dhe manipulimet që dëmtojnë individët dhe komunitetet?
Heshtja e SPAK në këtë rast nxjerr në pah një tjetër sfidë të rëndësishme për sistemin e drejtësisë në Shqipëri, ku mund të lindin dyshime për ndikimin e oligarkëve dhe për lidhjet e mundshme mes politikanëve dhe individë me pushtet.
