Prokuroria e Posaçme kundër Korrupsionit dhe Krimit të Organizuar, ka nisur hetimet për pasurinë e dhjetë të arrestuarve pas zbulimit të laboratorit të drogës në Frakull.
SPAK po verifikon llogaritë bankare të arrestuarve, shtetasve: Viktor Cervanaku, Zenel Cervanaku, Denilson Cervanaku, Enxhi Ferhati, Nikolin Gjolena, Klajdi Vrioni (Kodra), Julian Malaj, Redion Meshi, Bledar Matoshi, Marildo Rona.
Ata akuzohen si porositës dhe organizatorë të trafikut të 430 kilogramëve kokainë nga Kolumbia, ndërsa Prokuroria ka nisur shkresa pranë institucioneve të regjistrimit të pasurive të luajtshme dhe paluajtshme.
Pas përmbylljes së fazës së parë të hetimeve për rastin e trafikut ku vuri në pranga Nikolin Gjolenën, si financier dhe 9 persona të tjerë, tashmë kërkon të gjurmojë pasuritë që mund të kenë në emrin e tyre dhe të familjarëve, për të parë nëse janë me burime të ligjshme.
Kujtojmë se nga hetimet 3 mujore të SPAK, u zbulua se Çervanaku porositi sasinë prej 24 ton plehu kimik në Kolumbi dhe brenda saj u fsheh ngarkesa e kokainës vlera e të cilës përllogaritet në rreth 40 milionë euro. Hetimet për këtë çështje janë ende në vijim pasi dyshohet se në këtë aktivitet kriminal janë përfshirë edhe persona të tjerë.
