Prokuroria e Posaçme ka firmosur 15 urdhër arreste, për persona të implikuar në aferën e inceneratorit të Tiranës.
Raportohet se 4 persona janë vënë në pranga dhe të tjerë janë ende në kërkim.
Mes tyre është edhe Taulant Tushe, drejtori i Përgjithshëm i Punëve Publike në Bashkinë e Tiranës. Një tjetër drejtor i Erjon Veliajt që pritet të arrestohet shumë shpejtë është dhe Mariglen Qato. Qato pritet të bëhet personi i dytë i rëndësishëm nga Bashkia Tiranë që bie në prangat e SPAK për shpërdorim detyre dhe mos vjelje gjobash. Qato është kallëzuar në Prokurori dhe SPAK nga KLSH.
Prokuroria e Tiranës akuzon kreun e Inspektoratit të Mbrojtjes së Territorit në bashkinë e Tiranës, Mariglen Qato se i është shmangur hetimit. Sipas dokumenteve të publikuara edhe pse kërkuan disa herë paraqitjen e tij, zyrtari nuk ka shkuar asnjëherë për t’ju përgjigjur autoriteteve me pretendimin se ka qenë i sëmurë dhe se nuk mund të jepte shpjegime.
Por teksa pretendonte se ishte i sëmurë, në fakt Mariglen Qato ka qenë në punë dhe këtë e tregojnë pamjet e kamerave të sigurisë në IMT e bashkisë Tiranë.
“Kreu i IMT në bashkinë e Tiranës ka refuzuar të paraqitet në prokurori, duke dërguar një raport mjekësor nga data 7 qershor 2021 deri në datën 9 qershor 2021. Këtë mekanizëm e ka përsëritur sërish nga data 9 qershor 2021 deri më datën 21 qershor 2021, duke pretenduar për gjendjen të rënduar të shëndetit…”-thotë prokuroria. Po këto ditë, ai ka shkuar në punë, ka qëndruar disa orë dhe më pas është larguar.
Nisur nga kjo situatë, prokuroria e Tiranës ka kërkuar në gjykatë caktimin e masës së arrestit në burg për Mariglen Qaton, dy inspektorët Landro Lamani dhe Adrian Çaushaj si dhe Klevis Bregu.
