Dy ditë pasi SPAK e mori të pandehur për akuzën e ‘korrupsionit pasiv’ dhe ‘pastrim parash’, sot (13 shtator) dhëndri i Sali Berishës, Jamarbër Malltezi është paraqitur në Apelin e GJKKO.
Mësohet se si Sali Berisha edhe Jamarbër Malltezi kanë bërë kërkesë për zëvendësimin e masës së sigurisë.
Po ashtu Malltezi ka shkuar në Apelin e GJKKO për të marrë informacione mbi hetimet.
Kryetari i Partisë Demokratike dhe ish-kryeministri Sali Berisha u thirr në SPAK të mërkurën, ku i është njoftuar akuza e korrupsionit pasiv, marrja si i pandehur dhe mbyllja e hetimeve ndaj tij dhe dhëndrit të tij Jamarbër Malltezi. Edhe këtij të fundit iu komunikua akuza e korrupsionit dhe pastrimit të parave.
Berisha sulmoi prokurorinë se kishte ngritur çështje politike të bazuar sipas tij në mashtrime.
“Jam i pandehur për ato akuza që kam pasur, asgjë tjetër. Asgjë tjetër përveç 500 faqe me mashtrime, mashtrime, mashtrime. Asgjë nuk ndryshon. Është vazhdimi i një hakmarrje politike, zbatimi i një urdhri mafioz politik. Për mua, kjo nuk ndryshon asgjë. Ajo që është themelore, që nuk ekziston asnjë provë, asnjë fakt, asnjë dokument që të dëshmojë që në të gjithë këtë proces ka ndodhur shkelja më e vogël”, tha Berisha pasi doli nga SPAK.
Berisha është në hetim për veprën penale të korrupsionit së bashku me dhëndrin e tij, Jamarbër Malltezi, i cili akuzohet nga SPAK se ka përfituar të ardhura në vlerën e 5.4 milionë eurove nga një biznes ndërtimi në mënyrë të parregullt falë vendimeve të qeverisë të marra nga vjehrri i tij.
Si Berisha ashtu edhe Malltezi i kanë kundërshtuar akuzat dhe e kanë cilësuar hetimin si të orkestruar nga kryeministri Edi Rama. Gjithashtu, Berisha dhe mbështetësit e tij e kanë cilësuar këtë masë si përpjekje për asgjësimin e opozitës.
