Në Ditën Ndërkombëtare të Shkopit të Bardhë, Durrësi u bë epiqendër e një marshimi proteste organizuar nga anëtarët e shoqatës së të verbërve. Në këtë aktivitet iu bashkuan dhe individë të tjerë me aftësi të kufizuara, të cilët përballen me sfida të shumta në një realitet që shpeshherë nuk ofron mbështetje të mjaftueshme.
Pjesëmarrësit kërkuan integrim, mbështetje institucionale, akses në hapësira publike dhe respektim të të drejtave të tyre të garantuara nga ligji. Saimir Farrici, president i shoqatës “Shpresë për të Verbërit”, thekoi se personat e verbër përballen çdo ditë me vështirësi të shumta, duke filluar nga lëvizja, e cila vijon të jetë një barrierë e madhe.
Po ashtu, Jonuz Meta, kryetar i shoqatës së të verbërve të Durrësit, theksoi nevojën për përfshirjen e tyre në proceset vendimmarrëse dhe jetën publike. Kjo kërkesë u mbështet edhe nga Adivie Hoxha, kryetare e shoqatës së tetraplegjikëve, e cila kërkoi solidaritet shoqëror dhe investime konkrete për përmirësimin e kushteve të jetesës së të gjithë individëve me aftësi të kufizuara.
Ky aktivitet nënvizoi rëndësinë që ka Dita Ndërkombëtare e Shkopit të Bardhë, e cila simbolizon pavarësinë dhe dinjitetin e personave të verbër në mbarë botën. Përmes protestës, të rinjtë dhe të moshuarit që përballen me këto sfida kërkoin që zëri i tyre të dëgjohet dhe nevojat e tyre të trajtohen me seriozitetin që meritojnë.
