Një prej 34 personave të arrestuar nga FBI për baste dhe ndeshje poker ilegale, në kuadër të hetimeve që tronditin NBA, është Damon Jones, 48 vjeç. Jones, i njohur si mik i LeBron James dhe me akses të privilegjuar te Los Angeles Lakers, akuzohet për përfitimin nga informacionet e papublikuara që ka ndihmuar në vënien e basteve.
Sipas akuzës, Jones dyshohet se ka tentuar të informojë të tretët mbi situatën e LeBron James para një ndeshjeje të caktuar. Më 9 shkurt 2023, pak orë para sfidës mes Milwaukee Bucks dhe Los Angeles Lakers, Jones dërgoi një mesazh te një bashkëpunëtor duke sugjeruar një bast të fortë për Milwaukee. E rëndësishme është se në atë ndeshje, James nuk ka luajtur për shkak të një dhimbjeje në kavilje, vetëm dy ditë pas kalimit të rekordit të Kareem Abdul-Jabbar si shënuesi më i mirë në historinë e NBA.
Edhe pse Jones nuk ishte pjesë formale e stafit teknik të Lakers për sezonin 2022-23, ai vazhdonte të punonte me LeBron gjatë nxemjes dhe kishte akses në dhomat e zhveshjes. Akuzat ndaj tij përfshijnë shfrytëzimin e informacionit të rezervuar për të përfituar dhe për të ndihmuar vënësit e basteve. Ndërsa LeBron James nuk është akuzuar për ndonjë veprim të paligjshëm, ai është konsideruar një viktimë e këtij skandali.
Burime të afërta me James, të cituara nga ESPN dhe ‘The Athletic’, kanë sqaruar se ai nuk ishte në dijeni të aktivitetit të Jones. Los Angeles Lakers, përmes mediave amerikane, nuk kanë dhënë asnjë koment në lidhje me këtë çështje. Hetimet e FBI për baste të paligjshme dhe ndikimin e mundshëm të tyre në ndeshjet e NBA vazhdojnë, lënë pasoja të mëdha për reputacionin e ligës.
