Hetimi mbi publikimin e imazheve të vjedhura të grave, duke përfshirë figura publike si kryeministrja italiane Giorgia Meloni, në platforma pornografike të paligjshme si “Phica.eu” dhe “Comeup”, ka marrë një kthesë të rëndësishme. Autoritetet italianke, sipas Policisë Postare, kanë identifikuar administratorin e këtyre faqeve, një shtetas italian, dhe disa nga bashkëpunëtorët e tij, pavarësisht se serverat ndodhen jashtë vendit. Raporti i parë zyrtar do t’i dorëzohet Prokurorisë së Romës, ndërsa hetime të ngjashme po zhvillohen edhe në qytete të tjera italiane, pas ankesave nga viktimat, shumica e të cilave janë gra.
Hetimi përfshin akuza të rënda, duke filluar nga shpifja deri te nxitja për dhunë. Përveç administruesve të platformave, hetuesit po shqyrtojnë përdoruesit që kanë postuar komente ofenduese nën imazhet e publikuara; shumë prej tyre janë identifikuar dhe rrezikojnë akuzat për shpifje, dhunë private dhe nxitje për krime. Gjithashtu, po shqyrtohen lidhjet mes këtyre faqeve dhe portaleve të tjera në rrjetin e errët, që mund të përmbajnë materiale edhe më të rënda.
Shtimi i hetimeve për një faqe Facebook me emrin “Mia Moglie”, e cila është mbyllur pas një vale raportimesh për shkelje të privatësisë, tregon për një praktikë të ngjashme ku imazhe të grave, pa pëlqimin e tyre, përdoren bashkë me komente denigruese. Në këtë kontekst, avokatja Annamaria Bernardini de Pace ka njoftuar një padi kolektive ndaj Facebook (Meta) për dështimin në monitorimin e përmbajtjeve të paligjshme, duke e quajtur këtë rast një shkelje serioze të dinjitetit femëror.
Në qytete si Xhenova, viktimat kanë filluar të identifikojnë publikisht ata që kanë postuar imazhe të tyre në këto platforma, duke i ekspozuar këta përdorues në mediat sociale. Përkundër përpjekjeve për t’u fshehur, duket se për hetuesit ka kaluar shumë vonë për ta fshirë gjurmët. Ky rast ka nxitur një reagim të gjerë dhe reflektim mbi shkeljet e privatësisë dhe dhunën ndaj grave në internet.
