Kongresi i UEFA-s në Beograd, ka treguar edhe një herë vlerat e mëdha të këtij sporti në misionin e bashkëpunimit dhe ndërlidhjen mes vendeve të ndryshme pavarësisht historisë, politikës dhe së shkuarës, por kjo me sa duket vetëm për një moment.
Në zemër të Serbisë, në Beograd, dje u ngrit flamuri i Kosovës, si shtet i pavarur dhe i njohur nga organizmat ndërkombëtare politik dhe sportiv si UEFA.
Presidenti i FFK-s, Agim Ademi ka pozuar me flamurin e Kosovës duke treguar edhe një herë se tashmë këmbëngulja e serbëve është një mendësi i gabuar dhe e prapambetur.
Gjithsesi ka zgjatur më pak se 24 orë ky imazh. Federata Serbe e Futbollit nëpërmjet një njoftimi zyrtar ka njoftuar heqjen e flamurit të Kosovës nga ambientet e kongresit.
Përmes një deklarate për mediat, Federata Serbe e Futbollit bën të ditur se e ka hequr flamurin e Kosovës.
“Organizimi i jashtëzakonshëm u zbeh nga një neglizhencë e organizatorëve, të cilën një pjesëmarrës i Kongresit u përpoq ta shfrytëzonte për interesa jo-futbollistike. Reaguam së bashku, shpejt dhe vendosmërisht, dhe me përgjegjësi të plotë informojmë publikun se sot në Kongresin e UEFA-s në Beograd nuk ka flamuj apo simbole të të ashtuquajturit Kosovë”, thuhet në deklaratë.
“Kërkojmë falje për çdo qytetar tonin, veçanërisht bashkatdhetarëve tanë në Kosovë dhe Metohi, të cilët u shqetësuan dhe u lënduan nga kjo lëshim i organizatorëve, i cili u korrigjua menjëherë me reagimin tonë”.
