Kombëtarja shqiptare e futbollit do të zhvillojë dy ndeshjet e vlefshme për Ligën e Kampionëve, në 16 nëntor kundër Republikës Çeke dhe më 19 nëntor kundër Ukrainës.
Të dyja këto përballje do të luhen në “shtëpi”, në stadiumin “Arena Kombëtare”, i cili pritet që në të dyja ndeshjet të jetë plot me tifozë kuqezi. Të paktën, këtë na tregon shitja e biletave, deri më tani.
Në faqen online të shitjes së biletave, tregohet se për ndeshjen Shqipëri-Rep Çeke janë shitur të gjitha, teksa për përballjen me Ukrainën kanë mbetur shumë pak.
Por a kanë shkuar të gjitha këto bileta tek tifozët që duan të mbështesin kombëtaren? Nga një vëzhgim i kryer nga Gazeta Shqip, rezulton se realiteti nuk është i tillë.
Në rrjetet sociale kanë nisur të hapen llogari, që shërbejnë për shitjen e këtyre biletave në treg të zi, e sigurisht me një çmim shumëfish më të lartë.
Këto llogari janë të shumta dhe menaxhohen nga njerëz që kanë blerë disa dhjetëra bileta. Sigurisht, kjo nuk është hera e parë që ndodh, pasi sa herë ekipi ynë kombëtar bën paraqitje të mira, interesi për ta parë nga afër rritet dhe kështu, përfitojnë këta persona.
