Skandali i përdorimit të pesticideve mbi normat e lejuara në produktet shqiptare ka marrë përmasa më të gjera, duke përfshirë tërheqjen urgjente të specave të kuq nga Sllovenia dhe shkatërrimin e domateve dhe pjeshkëve në Kroaci. Pas blokimit të domateve dhe pjeshkëve shqiptare në Kroaci për shkak të pesticideve të tepruara, tashmë është identifikuar një rast tjetër problematik në Slloveni.
Kompania Geaprodukt në Slloveni ka udhëhequr tërheqjen e specave të kuq, të cilat u eksportuan nga Shqipëria mes datave 24 gusht dhe 4 shtator. Autoritetet sllovene zbuluan se produkti përmbante pesticide si acetamiprid, formetanate dhe flonicamid, që i kalonin ndjeshëm normat e lejuara. Në përpjekje për të mbrojtur shëndetin publik, kompania ka kërkuar nga qytetarët që të mos konsumojnë specat dhe t’i kthejnë ato në vendin e blerjes ose t’i hedhin.
Ky skandal nuk është një rast i izoluar. Në Kroaci, autoritetet shkatërruan 4 ton domate shqiptare, të cilat ishin spërkatur pesë herë më shumë se norma e lejuar me pesticide të rrezikshme, në këtë rast chlorfenapyr. Po ashtu, me 22 gusht, gjithashtu u shkatërruan 5 ton pjeshkë nga Divjaka për shkak të pranisë së metalit të rëndë, nikel, në këtë frut.
Deri më tani, autoritetet në Slloveni kanë paralajmëruar përdoruesit që të dezinfektojnë duart pas kontaktit me ushqimet e kontaminuara. Ky skandal nxjerr në pah shqetësimet për sigurinë e ushqimeve importuese nga Shqipëria, si dhe nevojën për një mbikëqyrje më të fortë mbi praktikat e përdorimit të pesticideve. Ndërkohë që ndodhen përballë këtyre problemeve, qytetarët shqipëtarë dhe institucionet janë të detyruar të rishikojnë legjislacionin dhe praktikat e tyre në bujqësi për të siguruar një prodhim më të sigurt.
