Nënkryetarja e Partisë së Lirisë Erisa Xhixho përmes një postimi në rrjetet sociale shprehet se qeveria e plehrave i ka mbetjet biznesin e preferuar.
Xhixho thotë që skandali i radhës i 816 ton mbetjeve të nisura nga Porti i Durrësit po tregon haptas implikimin e drejtpërdrejtë të qeverisë në aferën kriminale të mbetjeve.
“Ndërkohë, projektligji i ri, i cili synon të zëvendësojë ligjin aktual për Menaxhimin e Integruar të Mbetjeve, në nenin 73 parashikon që, në përgjithësi importi i mbetjeve në Shqipëri ndalohet me përjashtim të rasteve kur Këshilli i Ministrave e lejon.
Pra, do të jetë vetë qeveria dhe kryeministri Rama ai që do të vendosë direkt se kur i leverdis importi i mbetjeve”, shkruan Xhixho.
Më tej ajo thekson se qeveria po e shtron rrugën për ta shndërruar Shqipërinë në një kazan mbeturinash dhe ne duhet ta ndalim duke bllokuar ligjin në Parlament.
“Ndërkohë që operacioni mafioz ndërkombëtar që mori jetë para syve të të gjitha strukturave të sigurisë në Shqipëri, një vend që ka detyrimin të respektojë standardet e NATO-s, tregon se të implikuar direkt janë pikërisht ideatorët e skemës së inceneratorëve.
Qeveria e mbetjeve dhe inceneratorëve nuk mund të tolerohet më! Ne mbështesim çdo reagim ndërkombëtar dhe i bashkohemi zërit të fuqishëm të qytetarëve dhe shoqërisë civile për të mbrojtur Shqipërinë nga çdo ligj shkatërrues i kësaj qeverie të zhytur në krim e korrupsion”, shprehet Xhixho.
