Premier League është përfshirë në një skandal të ri që lidhet me trukimin e ndeshjeve dhe baste të paligjshme. Fredrik Gardare, ish-shef i policisë suedeze dhe ekspert në hetimin e krimeve të organizuara dhe manipulimit të sportit, ka deklaruar se disa futbollistë të Premier League janë të përfshirë në aktivitete të tilla. Ai ka bërë këto komente pas një bastisjeje në një kazino të paligjshme që u zhvillua në vitin 2021, ku policia konfiskoi telefona që përmbanin prova të qarta për manipulimin e rezultateve, duke përfshirë baste mbi kartonë të verdhë dhe goditje këndi.
Gardare ka udhëhequr një hetim të gjatë 18-mujor që ekspozoi ish-mesfushorin e Manchester City, Dickson Etuhu, i cili u dënua për përpjekje për trukim ndeshjesh në Suedi, duke u përjashtuar për pesë vite nga ky sport. Edhe pse provat nga hetimi i fundit janë cilësuar si “të qarta dhe të pakontestueshme”, policia suedeze ka vendosur të mos vazhdojë me çështjen dhe telefoni me provat mbetet i sekuestruar në Stokholm.
Gardare e ka cilësuar këtë rast si “më të qartin nga të gjithë” që ka hetuar, duke e konsideruar si të pamundur që të injorohet kur janë dokumentuar në një celular të konfiskuar. Federata Suedeze e Futbollit ka konfirmuar se ka marrë informacion “të përgjithshëm” nga policia lidhur me manipulimin e ndeshjeve, por nuk ka dhënë detaje specifike për shkak të sekretit hetimor.
Nga ana tjetër, Premier League ka deklaruar se nuk është në dijeni të kësaj çështjeje dhe që është Federata Angleze e Futbollit (FA) ajo që ka kompetenca për hetime të tilla. Kjo situatë vjen pas raportimeve të tjera nga media, ku vetëm një vit më parë u zbuluan kontakte me të paktën pesë lojtarë të Premier League nga rrjete ndërkombëtare të basteve të paligjshme për të ndikuar në ndeshje. Ky zhvillim rihap pikëpyetje rreth integritetit të ligës dhe performancës së saj në parandalimin e trukimit të ndeshjeve.
