Mijëra afganë, të sjellë në Mbretërinë e Bashkuar përmes skemës së zhvendosjes dhe ndihmës për bashkëpunëtorët e trupave britanike, janë bërë viktima e një shkeljeje të sigurisë së të dhënave pas një sulmi kibernetik ndaj një nënkontraktori të Ministrisë së Mbrojtjes. Raportet tregojnë se deri në 3,700 individë mund të kenë pasur të dhëna të ndjeshme të ekspozuara, duke përfshirë emra, datat e lindjes, informacionet e pasaportës dhe numrat e referencës nga skema Arap (Afghan Relocations and Assistance Policy). Incidenti është i lidhur me kompaninë Inflite The Jet Centre e cila operon në aeroportin Stansted të Londrës.
Shkelja ndodhi mes janarit dhe marsit 2024, periudhë në të cilën shumë afganë u transferuan në Mbretërinë e Bashkuar. Familjet e prekur u njoftuan për incidentin përmes një emaili zyrtar të premten, ku u paralajmëruan për mundësinë e komprometimit të të dhënave personale. Ky është incidenti i dytë serioz në pak kohë; një shkelje e ngjashme një muaj më parë preku rreth 19,000 aplikantë afganë të vitit 2022.
Megjithatë, qeveria britanike ka theksuar se nuk ka prova që të dhënat e ekspozuara janë shpërndarë ose publikuar dhe se “incidenti nuk ka përbërë rrezik për sigurinë e individëve dhe nuk ka cënuar asnjë sistem qeveritar”. BBC raporton se, përveç afganëve, të prekurit mund të përfshijnë edhe ushtarakë britanikë dhe ish-ministra të qeverisë konservatore.
Një zëdhënës i qeverisë u shpreh se po ndërmerren të gjitha masat e nevojshme për të adresuar situatën, duke theksuar: “E marrim sigurinë e të dhënave jashtëzakonisht seriozisht dhe po shkojmë përtej detyrimeve tona ligjore në informimin e të gjithë individëve potencialisht të prekur.” Kjo shkelje e rëndë do të ngrejë shqetësime të mëdha mbi mbrojtjen e të dhënave dhe menaxhimin e informacionit të ndjeshëm.
