Tenderi “emergjent” i hapur nga Autoriteti Rrugor Shqiptar për rrëshqitjet në Librazhd nuk është thjesht një procedurë urgjence — është një skemë që ngre dyshime të forta për favorizim dhe riciklim përgjegjësish. Ironikisht, fituese shpallet po e njëjta kompani që lidhet drejtpërdrejt me shembjen që bllokoi për ditë të tëra një zonë të tërë. Bëhet fjalë për A.N.K., në pronësi të Agim Kolës, e cila ndërton rrugën… dhe njëkohësisht përfiton nga pasojat e dështimit të saj.
Dokumentet e hulumtuara nga Timoni.al hedhin dritë mbi një proces që duket i paracaktuar. Drejtuesit e rinj të ARRSH-së, nën drejtimin e Ami Kozelit, nuk kanë ndjekur një garë të hapur, por kanë hyrë në negociata direkte me firmën e Kolës për “zgjidhjen” e situatës — duke hedhur inerte në zonën e shembjes. Pyetja thelbësore është: si mund të negociohet me një kompani që dyshohet se është vetë shkaktare e problemit? A është kjo kompani nën hetim? A ka nisur Prokuroria e Elbasanit një procedim për këtë skandal?
A.N.K. nuk është e vetmja që duhet të japë llogari. Nën lupë duhet të vihen edhe firma projektuese dhe vetë drejtuesit e ARRSH-së. Pasojat janë konkrete: mijëra qytetarë të izoluar, qindra kilometra shtesë për të arritur në Tiranë apo qytete të tjera dhe një kosto e fshehur që rëndon mbi xhepat e taksapaguesve. Nëse dëmi i parë ishte fizik, a nuk përbën tenderi “emergjent” një dëm të dytë, financiar për shtetin?
Procedura e ndjekur është po aq problematike sa vetë situata. Bëhet fjalë për një “negocim pa shpallje paraprake”, pra një kontratë e mbyllur, ku fituesi de facto zgjidhet në tavolinë. Objekti: “masa parandaluese mbi rrëshqitjen në zonën ‘Ligata e Bicit’, Dragostunjë”, me një fond limit prej 93.7 milionë lekësh pa TVSH dhe afat realizimi 2 muaj e 14 ditë. Në garë, formalisht, figurojnë dy kompani: A.N.K. me ofertë rreth 88.4 milionë lekë dhe “2 T” me rreth 93.3 milionë lekë.
Por a kemi realisht garë? Oferta e “2 T” duket më shumë si alibi procedurale — pothuajse identike me fondin limit — sa për të justifikuar prezencën e një konkurrenti. Ndërkohë, sinjalet në terren flasin qartë: që në momentin e parë dihej kush do ta fitonte, mjafton të shihje makineritë që punonin në zonë.
Ky nuk është rasti i parë. Në fund të vitit 2023, ARRSH — atëherë nën drejtimin e Evis Berberit, sot i arrestuar për abuzime — i dha po kësaj kompanie ndërtimin e një segmenti me vlerë rreth 2.5 miliardë lekë (mbi 25 milionë euro). Kontrata u lidh në vitin 2024 dhe punimet vijojnë edhe sot. Por, njësoj si në Qafën e Qarrit në aksin Korçë–Ersekë, edhe këtu shembjet duket se ndjekin të njëjtën firmë.
Pra, skema është e qartë dhe alarmante: një kompani fiton tenderin, ndodh shembja, krijohet emergjenca dhe po ajo kompani shpërblehet sërish për “riparimin”. Një cikël i mbyllur ku dështimi nuk ndëshkohet, por paguhet dy herë.
Kjo nuk është më thjesht çështje infrastrukture — është çështje përgjegjësie penale. SPAK duhet të ndërhyjë.
