Një skemë e sofistikuar manipulimi rezultatesh është zbuluar nga autoritete italiane, e njohur si “Operacioni Penalty”, që përfshin gjyqtarë, sipërmarrës dhe bastvënës. Hetimet tregojnë se kjo skemë kishte si qëllim ndikimin në ndeshjet përmes korrupsionit të arbitrit për të përfituar nga bastet sportive, me një sistem të thjeshtë por efektiv.
Një gjyqtar nga Reggio Calabria kontaktonte kolegët e tij në liga të ndryshme, duke i korruptuar me shuma deri në 10,000 euro për çdo ndeshje të manipuluar. Në fushë, këta gjyqtarë siguronin përfundimin e ndeshjeve me një numër të caktuar golash, duke favorizuar bastet e tipit Over, me fitimet që ndaheshin mes tyre dhe rrjetit të basteve.
Skema u zbulua pas një fluksi të pazakontë bastesh në një ndeshje të kampionatit Primavera, çka i tërhoqi vëmendjen Agjencisë së Doganave dhe Monopoleve, e cila e raportoi menjëherë Prokurorinë e Reggio Calabria-s. Pas këtij raportimi, nisi një hetim penal i gjerë që çoi në identifikimin e rrjetit.
Në orët e para të mëngjesit të sotëm, Karabinierët dhe Guardia di Finanza ekzekutuan urdhra arresti ndaj pesë personave, të akuzuar për komplot për mashtrim sportiv. Qendra e hetimit është një gjyqtar që vepronte në kampionatet Primavera dhe Serie C, i cili, pavarësisht nga pezullimi i mëparshëm, rekrutonte gjyqtarë të tjerë që jepnin vendime të padrejta, si penalizime dhe kartonë të kuq, me ndikim direkt në rezultatin e ndeshjeve.
Sipas hetimeve, rrjeti ishte financuar nga dy sipërmarrës toskanë, baba e bir, që kishin një pikë bastesh në Sesto Fiorentino dhe ishin tashmë në arrest. Ata përdornin platforma të paautorizuara për të vendosur baste mbi ndeshjet e manipuluara, duke siguruar fitime të konsiderueshme. Autoritetet vijojnë hetimet për të përcaktuar nëse ky rrjet kishte lidhje me struktura më të gjera të manipulimit të basteve. Ndërkohë, Federata Italiane e Futbollit (FIGC) pritet të iniciojë një proces disiplinor ndaj gjyqtarëve të përfshirë.
