Gjatë vitit 2024, Skema Kombëtare e Investimeve tërhoqi 403 aplikues, përfshirë kryetarin e FRPD së Kuçovës, Ardit Bënja. Ai kishte realizuar projektin e tij për ndërtimin e një stalle lopësh me vlerë 28.830.911 lekë të reja, duke kërkuar të përfitojë një grant prej 50% nga AZHBR.
Projekti u realizua nga inxhinieri Ylli Ago dhe u shqyrtua nga vajza e tij, Ana Ago, e cila punon si inspektore në AZHBR. Pavarësisht konflikteve të mundshme të interesit, Ana e miratoi projektin e babait, duke çuar në finalizimin e kontratës. Në përfundim, Arditi përfitoi 14.415.455 lekë të reja si grant.
Dosja e projektit përmbante firmat e Anës dhe drejtoreshës së AZHBR, Ardita Kuçi, e cila reklamoi stallen si një histori suksesi, pavarësisht se emri i Ylli Ago figuronte në çdo faqe të projektit. Aktualisht, Bënja SHPK ka marrë 30% të shumës si parapagim, ndërsa pjesa tjetër do të paguhet pas përfundimit të investimit.
Fondi i skemës për vitin 2024 ishte 1.5 miliard lekë, i cili u shpërnda në pesë masa: ndërtimi i serave diellore, rrjete antibreshëri, stallave, mekanizmave bujqësorë, dhe rrjetave për akukulturë. Kjo skemë synon të zëvendësojë programin IPARD, i cili është pezulluar për gati tri vjet për shkak të dyshimeve për korrupsion, duke u hetuar nga OLAF dhe SPAK.
