ELBASAN – Një tjetër premtim për infrastrukturën po rezulton një tjetër zhgënjim për qytetarët. Kompania “4AM”, e drejtuar nga biznesmeni Ardit Metaliaj, e cila ka fituar të drejtën për të ndërtuar disa lote të rëndësishëm në aksin Elbasan–Librazhd, ka braktisur thuajse totalisht kantierin, duke lënë pas një rrugë të pajetueshme për automjetet dhe kalimtarët.
Prej javësh, segmenti është kthyer në një re pluhuri, smogu dhe rreziku, ku kalimi i mjeteve bëhet me shumë vështirësi për shkak të shtresës së cakullit që nuk është stabilizuar, duke krijuar tym, zhvendosje inertesh dhe ndotje masive.
Firma “4AM” ka ndalur punimet — rruga pa ujitje, pa sinjalistikë, pa asnjë ndihmë për qytetarët
Burime nga terreni dhe banorët lokalë denoncojnë se kompania jo vetëm ka ndalur ritmin e punës, por as nuk merr përsipër mirëmbajtjen minimale të zonës së hapur, duke refuzuar edhe veprimin më të thjeshtë: ujitjen periodike të rrugës për të ndaluar krijimin e smogut.
“Kur kalon një makinë, nuk sheh dot as 2 metra përpara. Pluhuri të futet në mushkëri. Po të jesh këmbësor, ke vetëm një zgjidhje: të vraposh që të dalësh sa më shpejt.”, thotë një kalimtar që përdor përditë këtë segment.
Qytetarët në mëshirë të fatit — askush nuk mban përgjegjësi
Pamjet nga terreni tregojnë mjete që vështirësojnë kalimin në terren të sheshtuar, me gropa dhe pa asfalt. “4AM” duket se ka braktisur çdo standard teknik, ndërkohë që autoritetet publike heshtin dhe nuk marrin masa për të ndëshkuar neglizhencën flagrante.
Për më tepër, mungesa e masave mbrojtëse, mungesa e sinjalistikës dhe pluhuri i dendur përbëjnë kërcënim serioz për shëndetin e banorëve dhe për sigurinë rrugore. Shumë makina detyrohen të lëvizin me shpejtësi shumë të ulët, ndërsa këmbësorët bëjnë manovra të rrezikshme për të mos u zhytur në pluhur apo për të shmangur kontaktin me makinat që kalojnë me vështirësi.
“4AM” në heshtje totale – rruga që duhet të përfundonte, mbetet e pambaruar dhe e rrezikshme
Sipas kontratës dhe planit zyrtar, rruga duhet të kishte përfunduar brenda një afati të përcaktuar, por kompania nuk ka respektuar as afatet, as standardet, as qytetarët. E kontaktuar disa herë nga banorët, përfaqësues të firmës nuk kanë dhënë asnjë përgjigje.
“Le të mos e shtrojnë, por të paktën ta ujisin! S’po kërkojmë luks, po shëndet. Po marrim frymë pluhur çdo ditë!”, thotë një banor i zonës i revoltuar.
Ku janë institucionet? Kush mban përgjegjësi për këtë kaos?
Pyetja që ngrihet është e thjeshtë: Ku janë Autoriteti Rrugor Shqiptar dhe institucionet që duhet të mbikëqyrin punimet publike? Pse një kompani si “4AM” lejohet të braktisë punën, të lërë pas kaos, ndotje dhe rrezik për jetën, pa asnjë pasojë?
Kjo nuk është vetëm mungesë profesionale — është shkelje flagrante e kontratës publike, dhe duhet të përbëjë motiv për penalitete të menjëhershme dhe për përjashtim nga tenderët publikë.
TIMONI.AL kërkon përgjigje:
- Pse nuk është ndërprerë kontrata me “4AM” për mosrespektim të kushteve?
- Pse nuk urdhërohet firma të ujisë çdo ditë rrugën e hapur për të mbrojtur shëndetin publik?
- Cilat janë penalitetet për vonesat dhe neglizhencën?
- A do të mbajë përgjegjësi z. Ardit Meta Taliaj, administratori i kompanisë?
Qytetarët nuk mund të presin më. Aksi Elbasan–Librazhd nuk është pronë private e firmës “4AM”.
Nëse kompania nuk është në gjendje të përfundojë punimet, duhet të penalizohet sipas ligjit. Rruga nuk është kantier i braktisur, por arterie kryesore për qarkullimin e njerëzve dhe mallrave.
