Situata në Qarkun Lezhë vazhdon të jetë problematike për shkak të reshjeve të ulëta deri mesatare që kanë shkaktuar vështirësi në tre bashkitë e qarkut. Në Kurbin, po vazhdon puna për përforcimin e argjinaturës dhe sistemimin e shtratit të lumit Drojë, ku janë angazhuar tre eskavatorë nga forca të armatosura dhe operatorë privatë. Po ashtu, në fshatin Shpërdhet, janë duke punuar gjithashtu tre kamionë dhe një fadromë e bashkisë. Grupi i punës vazhdon vlerësimin e dëmeve, ndërsa Operatori i Shpërndarjes së Energjisë Elektrike (OSHEE) po punon për riparimin e linjës në fshatin Skuraj.
Në Lezhë, situata është shqetësuese për shkak të pranisë së ujit në toka bujqësore dhe disa oborre banesash. Vlerësimi i dëmeve është duke u kryer, megjithatë shpërndarja e ndihmave nuk ka nisur pasi ato nuk janë ende mbërritur. Hidrovori i Tales është funksional dhe ndihmon në menaxhimin e situatës.
Në Mirditë, reshjet kanë vazhduar dhe problemi kryesor mbetet aksi Rrëshen–Bukmirë, ku ulja e bazamentit të rrugës vazhdon pavarësisht ndërhyrjeve të kryera. Devijimi i rrjedhës së ujit në shtratin e Zallit të Zmejës rrezikon unazën lidhëse dhe disa banesa. Bashkia Mirditë ka kërkuar mbështetje për një eskavator dhe një kamion për punët në Zmejë dhe në rrugën e Bukmirës. Po monitorohen gjithashtu dy banesa të rrezikuara nga rrëshqitjet, ndërsa ndërhyrjet kryhen sipas nevojës emergjente.
Në aspektin e hidrologjisë, Hidrocentrali i Qafë Molla mund të nisë shkarkime deri në 100 m³/s, kurse Hidrocentrali Shkopeti po shkarkon po aq, pa rrezik për shkak të gjerësisë së shtratit të Matit. Furnizimi me ujë është normal, përkundër disa ndërprerjeve të herëpashershme të energjisë, të cilat janë rikthyer. Hidrovoret funksionojnë me kapacitet të plotë, ndërsa nivelet e lumenjve Drin dhe Mat janë brenda kuotave normale.
