Ishulli grek, Rodos po përjeton orë dramatike pasi zjarret kanë dalë jashtë kontrollit ndërsa njerëzit janë evakuuar nga plazhet e zonave Kiotari dhe Lardo, raportojnë mediat vendase. Pamjet që vijnë nga Rodosi janë tronditëse, si ato me pesë kuaj që vrapojnë nëpër rrugët e ishullit për t’u shpëtuar flakëve të zjarrit.
Qindra pushues janë larguar nga hotelet e tyre. Imazhet tregojnë qiellin mbi ishullin plot tym. Katër lokacione janë evakuuar, duke përfshirë dy resorte bregdetare. Flakët kanë arritur në tre hotele, të cilat gjithashtu janë evakuuar, sipas mediave lokale.
Zëdhënësi i Shërbimit Zjarrfikës, Yannis Artopios tha se më shumë se 200 zjarrfikës dhe 40 automjete zjarrfikëse po operonin në terren, të ndihmuar nga tre avionë dhe pesë helikopterë. Tre anije të rojes bregdetare si edhe një nga ushtria, po evakuonin pushuesit nga dy plazh të ishullit.
Kujtojmë që zjarret masive kanë përfshirë Greqinë prej ditësh si pasojë e valës së të nxehtit që vazhdon në Evropën Jugore.
