Roland dhe Ina Xhaxho e kanë mbajtur të miturin për 9 orë në sallë, me anestezi totale, dhe ua kanë dorëzuar më pas familjarëve në koma, duke thënë se kjo ishte një gjendje normale.
Një 3-vjeçar i identifikuar si Brian, ka humbur jetën pas një ndërhyrje që ka kryer për dhëmbët e tij në klinikën “Splendent” në afërsi të rrugës së Kavajës në Tiranë, ndërkohë që familjarët e tij kanë hedhur akuza të forta në drejtim të dy mjekëve Roland dhe Ina Xhaxho. Të dy nuk janë emra të panjohur, pasi Roland Xhaxho ka dhe një spital zemre me emrin e tij, dhe në klinikën dentare të së bijës, ai ofronte ekspertizë, në rastin e aplikimit të anestezisë. Klinika në fjalë në përshkrimin për aktivitetin e saj, thotë se ofron shërbim te dedikuar për fëmijët që kanë frikë nga dentisti, por edhe për ata me aftësi ndryshe.
Vdekja e të miturit ka ndodhur disa ditë më parë, ndërkohë që familjarët e tij, kanë dhënë më shumë detaje mbi ndërhyrjen e rëndë. Daja i Brian tregon se i mituri iu ishte ankuar se kishte probleme me disa dhëmbë dhe për këtë shkak nuk konsumonte dot ushqim, por pas ndërhyrjes me anestezi të plotë që i është bërë nga mjekët, fëmija ka përfunduar në gjendje kome.
Roland dhe Ina Xhaxho, ua kanë dorëzuar fëmijën në gjumë familjarëve me pretendimin se kjo ishte diçka e zakonshme pas aplikimit të anestezisë, por pasi e kanë çuar të miturin te shërbimi i pediatrisë, mjekët janë shprehur se 3-vjeçarit i ishte shkaktuar dëmtim i rëndë në mëlçi.
“Jam daja i djalit, kishte 3-4 dhëmbë të prishur, na ankohej se nuk hante bukë. Pyetëm shumë veta me anestezi, mjekë zemre, shkuam te Roland Xhaxho dy tre herë, bashkë me gocën i kanë trajtuar 14 dhëmbë djalit, e mbajtën nga ora 10 deri në 7 në sallë dhe na e dhanë çunin në gjendje kome, të rënduar. Na tha që ishte një gjendje normale për shkak të anestezisë. Kur e çuam te pediatria e futën direkt te reanimacioni pa puls. Mjeket bënë ta pamundurën, thanë se nëse do e kishim çuar më parë do kishte shpëtuar, i ishte helmuar mëlçia. Vrasësit janë Roland dhe Ina Xhaxho, do të bëjmë të pamundurën që ai të mos e kalojë kaq lehtë”, ka denoncuar daja i të miturit.
Ndërkohë që gjyshi i të miturit është shprehur se mjeku Xhaxho nuk iu ka hapur telefonin familjarëve të të miturit, pasi vunë re që gjendja e tij nuk po përmirësohej.
“Duam drejtësi. S’ka pas asnjë problem djali. A mund të ndërhyhet me një fëmijë për të mbushur 14 dhëmbë. Kjo s’ishte gjëja më e rëndë që na ka ndodhur. Shkuam në shtëpi dhe mjeku na tha s’ka asnjë problem, filloi u zverdh djali. Djalit filloi që t’i rritej temperatura sapo erdhi në shtëpi. E morëm mjekun në telefon dhe as nuk na hapte as telefonin”, ka denoncuar gjyshi i Brian.
I vogli ka qëndruar 3 ditë në koma në reanimacionin e pediatrisë në QSUT dhe më pas ka ndërruar jetë. Prindrit e të miturit kanë bërë kallëzim penal në komisariatin nr.4 në Tiranë, ndërkohë që policia njofton se kanë nisur hetimet për akuzën e ‘mjekimit të pakujdesshëm’.
“Specialistët për Hetimin e Krimeve të Komisariatit të Policisë Nr. 4 kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, për shtetasin R. Xh., 70 vjeç, banues në Tiranë, për veprën penale “Mjekimi i pakujdesshëm”, pasi ka bërë kallëzim shtetasi B. S. se shtetasi R. Xh. ka mjekuar në mënyrë të pakujdesshme në klinikën e tij private, djalin 3-vjeçar të shtetasit B. S., i cili pas mjekimit në këtë klinikë ka shfaqur komplikacione dhe pas 3 ditësh, ka humbur jetën, në spital”.
Familjarët kanë deklaruar se vogëlushi nuk vuante nga asnjë sëmundje dhe se kishin marrë vazhdimisht garanci nga doktori Xhaxho se nuk do të kishte asnjë komplikacion nga narkoza. /Zëri.ai
