Delegacioni zyrtar amerikan mbërriti në Konferencën e Sigurisë në Mynih të premten në mëngjes, me në krye Zëvendëspresidentin J.D. Vance dhe Sekretarin e Shtetit, Marco Rubio. Në fjalimin e tij paradite, Vance përcolli mesazhe të forta që nënkuptonin çmontimin e linjës liberale, veçanërisht asaj të lidhur me George Soros.
Kryeministri Edi Rama nuk ishte i pranishëm në sallë gjatë këtij fjalimi, por kishte pritshmëri të tjera për pjesëmarrjen e tij në konferencë. Ai synonte të merrte pjesë në një darkë të nivelit të lartë mbrëmjen e së premtes, ku do të ishin të pranishëm Zëvendëspresidenti Vance dhe Sekretari Rubio. Për këtë qëllim, Rama aktivizoi një ekip lobistësh, përfshirë Richard Grenell dhe dy biznesmenë shqiptarë, të cilët bashkëpunuan me një lobist nga Florida për të siguruar një ftesë për Ramën në këtë darkë.
Megjithatë, përpjekjet e tyre u penguan nga Susan Wiles, Shefja e Kabinetit të Presidentit Trump. Wiles, e njohur për mbështetjen e saj të fortë ndaj Trump dhe autoritetin e saj në administratë, ndërhyri energjikisht për të bllokuar këtë iniciativë. Si rezultat, lobisti nga Florida dështoi në përpjekjet e tij, dhe Rama nuk arriti të sigurojë pjesëmarrjen në darkën e nivelit të lartë, një mundësi që ai e konsideronte shumë të rëndësishme në këtë moment.
Në përpjekjet e tij për të forcuar lidhjet me administratën amerikane, Rama, në bashkëpunim me Grenell, ka tentuar të tërheqë në Shqipëri dhëndrin e Presidentit Trump, Jared Kushner, duke i ofruar atij ishullin e Sazanit për zhvillime turistike.
Megjithatë, administrata aktuale në Washington duket se është më e fokusuar në çmontimin e strukturave liberale të lidhura me Soros, dhe ka raporte të detajuara mbi aktivitetet e Ramës dhe lidhjet e tij me këto struktura.
Një raport i brendshëm detajon se çarja ndërmjet Ramës dhe kryetarit të Bashkisë së Tiranës, Erion Veliaj, filloi në vitin 2017 gjatë një eventi në New York, kur George Soros vendosi të kalojë drejtimin te djali i tij, Alex Soros. 
Rama e interpretoi këtë lëvizje si një përpjekje për ta zëvendësuar atë me Veliajn, dhe që atëherë ka punuar për të dobësuar pozitat e tij. Arrestimi i fundit i Veliajt ka krijuar tensione brenda Partisë Socialiste, dhe Rama ndjen nevojën për mbështetje ndërkombëtare për të konsoliduar pozitat e tij.
Përpjekja për të siguruar një takim me Zëvendëspresidentin Vance në Mynih ishte pjesë e kësaj strategjie, por ndërhyrja e zonjës Wiles e bëri të pamundur këtë takim, duke lënë Ramën me gisht në gojë dhe pa mbështetjen e dëshiruar në një moment kritik për karrierën e tij politike që dukes se ka marrë tatëpjetën në harkun e më pak se dy javëve./Sonila Muca , Mynih
