Partia Demokratike ka reaguar ndaj shtyrjes së mbledhjes së Këshillit të Mandateve për Belinda Ballukun, duke e cilësuar këtë veprim si një strategji për të penguar drejtësinë. Sipas demokratëve, mazhoranca ka zgjedhur të zvarritë çështjen si një mekanizëm mbrojtës për zv.kryeministren e akuzuar.
Në një deklaratë, ata theksojnë se vonesa e çështjes Balluku në Parlament dhe në Gjykatën Kushtetuese është rezultat i një operacioni politik të koordinuar, me qëllim bllokimin e SPAK-ut dhe mbrojtjen e korrupsionit në nivelet më të larta të pushtetit. Ata akuzojnë mazhorancën socialiste dhe kryeministrin Edi Rama për se janë përgjegjës për këtë zvarritje.
Kuvendi, sipas demokratëve, ka vijuar këtë praktikë duke shtyrë pa arsye të ligjshme mbledhjen e Këshillit të Mandateve. Justifikimi për këtë shtyrje është se pritet vendimi i Gjykatës Kushtetuese, megjithëse masa e re e sigurisë e kërkuar nga SPAK për Ballukun nuk lidhet me pezullimin nga detyra.
Demokratët insistojnë se të dy shtyrjet, ajo nga Gjykata Kushtetuese dhe ajo nga Kuvendi, përbëjnë pjesë të të njëjtit zinxhir mbrojtës të drejtuar politikisht nga Edi Rama. Gjykata Kushtetuese, sipas tyre, ka një detyrim ligjor për të shqyrtuar çështjen me prioritet, pas pezullimit të vendimit të GJKKO-së, në mënyrë që të mundësojë vazhdimin e hetimeve nga SPAK.
Partia Demokratike paralajmëron se çdo vonesë në proces është një shërbim për Edi Ramën, duke i dhënë atij më shumë kohë për të vonuar drejtësinë dhe për të ndihmuar Ballukun që të prishë provat e mundshme, intimidojë dëshmitarë dhe të vazhdojë aktivitetet e saj korruptive me vlerë miliona euro.
