Gjyqi ndaj deputetit Ervin Salianji, është shtyrë përsëri sot për të disatën herë, për dosjen “Babale”. Seanca në Gjykatën e Apelit pritet të zhvillohet në 10 ditëshin e parë të muajit të ardhshëm, më datë 9 nëntor në orën 14.00. Vetë deputeti e ka konsideruar hetimin “një paçavure”.
Ka qenë mbrojtja e palës tjetër që ka kërkuar që gjyqi i sotëm, ku Ervin Salianji rrezikonte të dënohej me 1 vit burg dhe të prangosej në sallën e gjyqit, duke humbur për rrjedhojë dhe mandatin e deputetit.
“Seanca sot u vonua dhe u shty për të disatën herë. Kjo çështje e nxjerr me shpejtësi para kohe, duhet të mbyllej para kohe. Fakti që është hedhur me short dhe është zgjedhur një trupë gjykuese, duhet të kishte vijuar procesi. Pjesëmarrja e deputetëve të opozitës është inkurajim për drejtësinë. Nuk ka lidhje me ndikimin politik”, është shprehur ai jashtë Gjykatës.
Sipas togave të zeza të Shkallës së Parë, përgjimet e dosjes “Babale” kanë qenë të inskenuara dhe Ervin Salianji është dënuar me 1 vit burg. Këtë masë dënimi deputeti demokrat e ka ankimuar në Gjykatën e Apelit, ku gjyqi është shtyrë për të disatën herë.
Në ambientet e jashtme të saj, sot janë shfaqur një numër i madh deputetësh demokratë, ata të grupimit të drejtuar nga Sali Berisha dhe ata të grupimit të drejtuar nga Enkelejd Alibeaj. Pavarësisht ndasive politike që kanë, sot ata janë bërë bashkë për kolegun e tyre dhe do të jenë në sallën e gjyqit.
