Zvarritja vazhdon. Shtyhet për në datë 13 Nëntor gjyqi për konfliktin në PD. Në gjyq janë tre palë, Lulzim Basha, Sali Berisha dhe Gazment Bardhi. Lulzim Basha kërkon që të regjistrohen ndryshimet në statut të vendimeve që mori Kuvendi i mbledhur në 2 Shtator.
Gjykata njohu si palë edhe Sali Berishën dhe Gazment Bardhin në këtë proces, që e kundërshtojnë këtë kërkesë. Por përse u shty gjyqi? Përfaqësuesi i ligjor i Lulzim Bashës, Indrit Sefa në gjyq kërkoi paraqitjen e disa dokumenteve nga pala tjetër, por që u rrëzua nga gjyqtari Niko Rrapi. Për këtë arsye, Indrit Sefa kërkoi përjashtimin e gjyqtarit.
“Sot kemi kërkuar dokumentacionin në lidhje me zhvillimin e këshillit kombëtar imagjinar dhe online. Asnjë gjë më shumë. Gjykata vlerësoi në mënyrë absurde, të qartë, vendosi që këtë dokumentacion të mos e kërkojë dhe për këtë arsye ne kërkuam përjashtimin e gjyqtares.
Do të paraqesim shkresën dhe provat. Do të shohim kujt do i shortohet kjo dosje. Është absurde që të vish në një proces gjyqësor dhe të mos paraqitësh dokumentacionin. Në kemi dyshime se ajo mbledhje nuk është kryer kurrë. Gjykata vlerësoi që të mbajë anë, duke thënë se dokumentet e paraqitura janë të plota” tha Indrit Sefa.
Grupi i Gazment Bardhit, që e kundërshton nismën e Lulzim Bashës e cilësoi të turpshme “lojën e Bashës. Po e zvarrit këtë çështje në mënyrë të turpshme. Ky është truk procedural” tha Marash Logu. Ndërkohë që gjyqi për vulën e PD-s është pezull dhe gjykimi është në dorë të Gjykatës së Lartë.
