Paraditen e sotme u zhvillua seanca e radhës në ditën e tretë tretë për vlerësimin e masave të sigurisë ndaj ish-kryeministrit Sali Berisha. Të pranishme ishin dy avokatet e tij të caktuara nga shteti, Jalldiz Kastrati dhe Rabije Cenalia.
Mes avokateve dhe prokurorisë që përfaqësohej nga Enkeleida Millonai dhe Arben Kraja ka pasur replika. Avokatet kanë kërkuar dy ditë kohë për t’u njohur me dosjen që ka të bëjë me privatizimin e ish-klubit sportiv “Partizani”.
“Më keni njoftuar mbrëmë në orën 20:00. Dua kohë, dy ditë për t’u njohur me dosjen që të bëj mbrojtje efektive” tha avokatja Cenalia. Por organi i akuzës replikoi duke e marrë si refuzim për të vijuar procesin, gjë që është kundërshtuar nga mbrojtësit ligjorë.
“Nuk refuzuam mbrojtjen, por duam kohë” ishte përgjigja e tyre. Në fund gjyqtarja Irena Gjoka vendosi që të linte kohë jo dy ditë, por katër orë kohë për të lexuar materialet.
