Në datë 6 Dhjetor kur në Shqipëri do të zhvillohet Samiti i BE-së me Ballkanin Perëndimor në Tiranë nuk do të “pipëtijë as miza”! Të paktën kështu janë masat që ka parashikuar qeveria. Gjithçka fillon me pushimin zyrtar.
Sot qeveria firmosi që data 6 Dhjetor të jetë ditë pushimi për administratën dhe shkollat. Unaza e vogël do të jetë e bllokuar. I gjithë bulevardi do të jetë me perimetër sigurie. Perimetri i sigurisë do të fillojë nga ura e Dajtit deri tek sheshi “Nënë Tereza”.
Nuk do të lejohet të kalojë askush që nuk është i akredituar. Qytetarët që duan të udhëtojnë drejt Rinasit duhet të gjejnë rrugë të tjera alternative pasi rruga kryesore do të jetë e bllokuar.
Në gatishmëri pritet që të jenë mbi 1500 efektivë policie, agjentë të SHISH dhe strukturat e tjera ligjzbatuese. Por në këtë ditë, pavarësisht se Edi Rama vendosi pushim administratën, sheshi pritet që të buçasë nga protesta e opozitës edhe pse policia dhe bashkia i refuzuan lejen Sali Berishës për t’u tubuar përpara Kryeministrisë.
Samiti do të nisë rreth orës 10 të mëngjesit, pritja e liderëve do të bëhet tek sheshi Italia dhe më pas do të drejtohen tek stadiumi Air Albania, aty ku do të zhvillohet edhe mbledhja e samitit.
Mbledhja do të ketë një ndërprerje rreth orës 13:00 për të vijuar me hapësirën e drekës, ndërsa rreth orës 15:00 pritet të mbahet konferenca e përbashkët mes kryeministrit Rama, kryetares së KE, Ursula Von der Leyen dhe presidenti i Këshillit Europian Charles Michele.
