Forcat amerikane kanë realizuar një sulm ajror në Oqeanin Paqësor, duke vrarë tre persona në një anije të dyshuar për trafik droge. Këtë e njoftoi Sekretari i Mbrojtjes, Pete Hegseth, duke theksuar se në këtë operacion të mërkurës nuk pati lëndime në radhët e forcave amerikane. Ky ishte sulmi i dytë brenda 24 orësh, pas një tjetër operacioni të martën që shkaktoi vdekjen e dy personave. Të dy anijet e sulmuara dyshohet se kishin në bord drogë, në rrugët tradicionale të trafikimit në ujërat ndërkombëtare.
Hegseth shpjegoi se këto sulme janë pjesë e një operacioni më të gjerë, të urdhëruar nga Presidenti Donald Trump, për të luftuar organizatat që ai i përshkruan si “narko-terroriste”. Në një postim në rrjetin social X, ai deklaroi se këta trafikantë janë përfitues të një veprimtarie kriminale, që dëmton qytetet amerikane, dhe se sulmet do të vazhdojnë.
Në lidhje me operacionet, Trump theksoi se ka autoritetin të urdhërojë sulme në ujërat ndërkombëtare, ndërsa për çdo veprim në tokë do të kërkonte miratimin e Kongresit. “Na lejohet ta bëjmë këtë, dhe nëse e bëjmë nga toka, atëherë do të kthehemi në Kongres,” u shpreh ai në një deklaratë nga Shtëpia e Bardhë.
Sipas Pentagonit, këto sulme ishin ato tëtë dhe të nëntë që nga 2 shtatori, duke shënuar të parat në Oqeanin Paqësor. Gjatë këtyre operacioneve, 37 individë janë vrarë, shumica e të cilëve në ujërat e Karaibeve. Në pamjet që u publikuan pas sulmit të mërkurës, një anije duket duke u djegur pas goditjes ajrore, e ndjekur nga një shpërthim i dytë, i destinuar për objektet lundruese.
