Për herë të parë, një grup shtetesh arabe dhe myslimane, përfshirë Katarin, Arabinë Saudite dhe Egjiptin, ka bë një thirrje të përbashkët që Hamasi të heqë dorë nga pushteti në Rripin e Gazës dhe të dorëzojë armët. Kjo është pjesë e një plani për t’i dhënë fund konfliktit të gjatë me Izraelin. Deklarata ka marr mbështetje nga të gjitha 22 shtetet anëtare të Ligës Arabe, Bashkimi Evropian si një njësi, dhe 17 vende të tjera, gjatë një konference të Kombeve të Bashkuara të organizuar nga Arabia Saudite dhe Franca në New York.
Qëllimi i këtij takimi ishte promovimi i një zgjidhjeje paqësore për çështjen palestineze dhe zbatimi i formulës me dy shtete. Dokumenti i miratuar thekson nevojën që qeverisja dhe siguria në territoret palestineze të jenë nën autoritetin e Autoritetit Palestinez me mbështetje ndërkombëtare.
Deklarata përcakton qartë se “Hamasi duhet t’i japë fund sundimit të tij në Gaza dhe të dorëzojë armët tek Autoriteti Palestinez”, si një hap i nevojshëm për krijimin e një shteti të pavarur palestinez. Për më tepër, ajo dënoi sulmin e 7 tetorit 2023 nga Hamasi ndaj Izraelit dhe propozoi krijimin e një “misioni të përkohshëm ndërkombëtar për stabilizimin”, i cili do të vendosej me ftesë të Autoritetit Palestinez dhe nën kujdesin e Kombeve të Bashkuara.
Dokumenti shprehu gjithashtu gatishmërinë e disa vendeve për të kontribuuar me trupa në këtë mision, duke theksuar rëndësinë e stabilitetit dhe të një marrëveshjeje paqësore në rajon.
