Shtëpia e Bardhë ka konfirmuar se më 14 qershor, në Ditën e Ushtrisë Amerikane dhe ditëlindjen e 79-të të Donald Trump, do të zhvillohet një paradë ushtarake madhështore. Parada do të përfshijë rreth 6,600 ushtarë, 150 mjete luftarake dhe 50 avionë, duke shënuar 250-vjetorin e krijimit të Ushtrisë.
Zëdhënësi i ushtrisë amerikane deklaroi se po shqyrtohen edhe mundësi për ta bërë festën më madhështore, përfshirë demonstrime shtesë dhe përfshirje të komunitetit. Kjo është përpjekja e parë serioze për një paradë të tillë që nga koha kur Trump propozoi një ngjarje të ngjashme në vitin 2018, por e hoqi nga planet pas raportimeve se do të kushtonte rreth 90 milionë dollarë.
Në të njëjtën ditë, ish-presidenti Trump shpalli planet për të ndryshuar emrin e ditës së Veteranëvë në “Dita e Fitores për Luftën e Parë Botërore”, për të nderuar kontributin amerikan në atë konflikt. Ai gjithashtu propozon që 8 maji, dita kur Gjermania naziste u dorëzua në 1945, të quhet “Dita e Fitores për Luftën e Dytë Botërore”, megjithëse nuk ka asnjë urdhër ekzekutiv që e bën këtë zyrtare dhe miratimi për festa federale mbetet në dorë të Kongresit.
Sekretarja për shtyp e Shtëpisë së Bardhë, Karoline Leavitt, sqaroi më vonë se emri i Veterans Day nuk do të ndryshojë, por se SHBA duhet gjithashtu të përkujtojë fundin e dy luftrave botërore si “Dita e Fitores”.
Ndërkohë, vendet si Britania, Franca dhe Kanadaja po shënojnë këtë vit 80-vjetorin e mbarimit të Luftës së Dytë Botërore në Europë, përmes aktiviteteve. Rusia, nga ana tjetër, zhvillon çdo vit një paradë të madhe për të përkujtuar “Luftën e Madhe Patriotike”, gjatë së cilës humbi rreth 27 milionë qytetarë sovjetikë.
Sipas Muzeut Kombëtar të Luftës së Dytë Botërore në SHBA, mbi 418,000 amerikanë humbën jetën gjatë konfliktit, shumica dërrmuese prej tyre ushtarakë.
