“Blindimi” i dyerve të godinës së Kryeministrisë tashmë është kthyer në një ritual që bëhet para çdo proteste të organizuar nga opozita.
Pasditen e sotme, janë fotografuar punëtorë të cilët kanë blinduar Kryeministrinë me veshje metalike, për të shmangur futjen e protestuesve brenda saj në rast se do të ketë trazira.
Protesta e opozitës e thirrur nga kreu i PD-së Sali Berisha do mbahet ditën e nesërme në orën 12:00. Protestuesit do të mblidhen në selinë e PD-së, më pas në sheshin “Skënderbej”, në sheshin “Nënë Tereza”, pastaj për të vijuar drejt bulevardit “Dëshmorët e Kombit”.
Në kuadër të protestës janë angazhuar rreth 1500 forca të policisë, duke nisur nga ato të rendit, FNSH dhe Garda e Republikës. Si në çdo protestë, mësohet se do të krijohet kordoni me efektivë policie para Kryeministrisë dhe perimetrit rreth saj.
