Kryeministri Edi Rama theksoi se Shqipëria nuk mund të ketë një ushtri të kompletuar deri tek arma bërthamore, duke theksuar se prioritet duhet të jetë efikasiteti në përdorimin e buxhetit të mbrojtjes dhe jo thjesht shtimi i shpenzimeve. Ai nënvizoi se Franca është një rast unik me një ushtri të kompletuar, por vendi ynë, si shumë vende të tjera europiane, duhet të jetë pjesë komplementare e sistemit të mbrojtjes së përbashkët.
Rama paralajmëroi rrezikun e mbushjes së depotimeve me pajisje që nuk përdoren, duke kërkuar një plan të qartë dhe efikas për menaxhimin e fondeve. Ai theksoi se Europa duhet të fokusohet jo vetëm te armatimet, por edhe te krijimi i një sistemi mbrojtjeje më të qëndrueshëm dhe gjithëpërfshirës, që mbron si territorin fizik, ashtu edhe atë shtetëror.
“Duke parë që tani është fryma e përgjithshme që të rriten buxhetet na vijnë kompani nga të katërt anët e Europës, kemi këtë për të shitur, kemi atë për të shitur, blini nga ne makina, blini biçikleta, është diçka që tregon se çështja nuk është se sa para vendosim ne në dispozicion por si t’i përdorim ato para me çfarë efikasiteti dhe si këto para e kompletojnë panoramën e përgjithshme të të gjithë vendeve Europiane. Franca është rast unikal që ka një ushtri nga A-ZH dhe mund ti bëjë vetë të gjitha, por Shqipëria nuk mundet dot ta ketë një ushtri të tillë dhe si Shqipëria ka edhe shumë vende të tjera që nuk mund të keni një ushtri që ti ketë të gjitha deri tek arma bërthamore. Ne duhet të jemi komplementarë në kontekstin e përgjithshëm, duhet një plan i mirë menduar me procedura të qarta për të gjithë dhe garanci eficense në ato paratë që vendosen”, deklaroi Rama.
Ai theksoi se duhet të jemi realist dhe të kuptojmë si do të rrisim kapacitetet jo buxhetin vetëm.
“Nëse kjo bëhet një histori që vendos në buxhet para dhe shpenzoji dhe shëno ato që i shpenzuam, atëherë do t’i kemi plot depot me lloj-lloj mallrash që as nuk do ti përdorim. Përpara disa javësh pata një bisedë me CEO e një prej kompanive më të mëdha të prodhimit të armëve në botë dhe më tha ‘kam vizituar një vend që ka blerë pafund armatime dhe që akoma i kanë të pahapura, nuk i kanë futur në punë’. Në letra rezulton si shpenzim i mjaftueshëm për ushtrinë por nuk është forcim i mbrojtjes. Ne duhet të jemi realist dhe të kuptojmë si do të rrisim kapacitetet jo buxhetin vetëm. Si do të kemi një sistem të mbrojtjes së Europës me efikas, më të gatshëm, më të plotë dhe jo si do kemi në blloqe shpenzime ushtarake për të blerë mjete. Europa nuk mund të kthehet në një territor ku flitet vetëm për armë dhe mendohet vetëm për luftë. Ka edhe plot gjëra të tjera që do i kemi parasysh. Kur vjen puna tek Europa ka dy territore për të mbrojtur, atë fizik dhe shtetëror”, tha Rama.
