Kryeministri Edi Rama është aktualisht në Londër për të marrë pjesë në panelin e Chatham House, ku diskutohet lidhja mes Ballkanit Perëndimor dhe Bashkimit Europian. Gjatë këtij eventi, Rama nënvizoi përparimin e Shqipërisë drejt integrimit në BE, duke shprehur optimizëm për marrëdhëniet aktuale me Europën, që sipas tij, po sillet në mënyrë pozitive ndaj vendit.
Rama theksoi se Shqipëria po ecën më mirë se disa vende europiane, duke përmendur se kjo fazë për vendin sjell sfida të reja. Ai bëri batuta gjatë fjalës së tij, duke thënë se ndonjëherë ndihen të ndërprerë kur flasin, duke aluduar për nevojën e dialogut të vazhdueshëm.
“Ne kemi shumë sfida, por kur vijmë në Britani ndihemi më mirë për sfidat tona. Kemi sfida, jemi në një periudhë ku Evropa po sillet shumë mirë me ne. Rreziku është i madh që t’i bëjmë të rinjtë të mendojnë se po humbasin kohë me ne, megjithatë besoj që në këtë pikë po ecim më mirë se Evropa”, tha Rama.
Ai përmendi gjithashtu besimin e tij në perspektivën e anëtarësimit të Shqipërisë në BE, duke shprehur se më shumë se 90% e tij i beson procesit të integrimit. Rama e krahasoi këtë situatë me ato të etërve themelues të BE-së, duke theksuar rëndësinë e lirisë dhe sigurisë për Shqipërinë. “Për ne, kjo është një bindje e fortë, dhe do të jemi pjesë e betejës për të arritur këtë qëllim”, u shpreh Rama.
Kjo vizitë dhe fjalimi i Ramës në Londër reflektojnë angazhimin e Shqipërisë për integrim, si dhe përpjekjet për të përmirësuar imazhin e vendit në skenën ndërkombëtare.
