Sipas informacionit të fundit nga Instituti i Gjeoshkencave (IGJEO) dhe Shërbimi Meteorologjik Ushtarak (SHMU), gjatë javës së ardhshme pritet që të ketë reshje të intensitetit të lartë në të gjithë territorin e vendit, të shoqëruara me shtrëngata dhe reshje dëbore në disa zona specifike.
Në ditën e Hënë, më 17 Nëntor 2025, reshjet do të jenë mesatare deri lokale intensive në qarqet Shkodër, Lezhë dhe Vlorë. Në Kukës, Dibër, Durrës, Tiranë dhe Gjirokastër priten reshje të dobëta deri mesatare, të shoqëruara me shtrëngata, me intensitetin që pritet të rritet në orët e pasdites.
Më 18 Nëntor 2025, reshjet do të intensifikohen në të gjithë vendin. Qarqet Shkodër, Kukës, Vlorë dhe Gjirokastër do të përjetojnë reshje intensive, ndërsa Lezha do të ketë reshje të ngjashme. Në Dibër, Durrës dhe Tiranë, priten reshje mesatare deri lokalisht intensive, ndërsa në qarqet e tjera do të ketë reshje të dobëta deri mesatare.
Të Mërkurën, më 19 Nëntor 2025, parashikohen sërish reshje me intensitet të lartë, sidomos në Shkodër, Kukës, Vlorë dhe Gjirokastër. Edhe për qarqet e tjera priten reshje mesatare deri intensive, të shoqëruara gjithashtu nga shtrëngata. Më pas, ditën e Enjte, 20 Nëntor, parashikohet një ulje e intensitetit të reshjeve, veçanërisht në Shkodër, Vlorë dhe Gjirokastër.
Përveç reshjeve të shirave, në zonat mbi 400 metra lartësi, veçanërisht në Veri, Lindje dhe Juglindje, priten reshje dëbore, që mund të shkaktojnë ngrica dhe vështirësi në qarkullimin rrugor. Sipas parashikimeve hidrometeorologjike, reshjet në basenin e lumit Drin mund të arrijnë deri në 300 mm.
Ministria e Mbrojtjes, përmes Agjencisë Kombëtare të Mbrojtjes Civile, ka kërkuar që të gjitha strukturat të marrin masa parandaluese për t’iu shmangur përmbytjeve dhe të jenë të gatshme për reagim të menjëhershëm. Agjencia do të mbajë publikun të informuar mbi zhvillimet në terren dhe rrezikun e përmbyteve dhe rrëshqitjeve të dherave, duke u kërkuar qytetarëve të tregojnë kujdes të shtuar gjatë kësaj periudhe me reshje intensive.
