Nga data 7 tetor, komisionet për transfertat jashtë Shqipërisë dhe ato që mbërrijnë në vend do të ulen ndjeshëm dhe do të bëhen më të shpejta. Kjo është rezultat i integrimit të vendit në zonën unike të pagesave në euro, SEPA, një proces që premton përfitime për qytetarët shqiptarë.
Në një konferencë për shtyp, guvernatori i Bankës së Shqipërisë, Gent Sejko, theksoi përfitimet ekonomike që sjell ky integrim. Ai nënvizoi se integrimi në SEPA do të ndihmojë në uljen e informalitetit dhe kostove të dërgesave, si dhe do të nxisë përfshirjen financiare dhe konvergjencën me tregjet evropiane. Sipas Bankës Botërore, një rritje prej 10% e pagesave digjitale mund të ulë nivelin e informalitetit me 2%. Më tej, emigrantët shqiptarë dhe familjet e tyre do të kursejnë dhjetëra miliona euro në vit përmes kanaleve bankare të SEPA-s.
Ambasadori i Bashkimit Evropian në Shqipëri, Silvio Gonzato, e cilëson këtë zhvillim si një përmbushje të premtimeve nga BE. Ai theksoi se ky është një hap drejt barazisë për qytetarët shqiptarë me ata të BE, duke ofruar transaksione me më pak kosto dhe më të shpejta. Gonzato theksoi rëndësinë e ndjekjes së angazhimeve politike për të arritur rezultate konkrete për popullatën dhe nënvizoi se BE është e angazhuar në këtë proces.
Kryeministri Edi Rama e renditi integrimin në SEPA si një hap përpara drejt anëtarësimit në BE. Rregullat e reja përcaktojnë se komisionet për transfertat elektronike do të jenë maksimumi 25 euro, duke shënuar një ulje me gati 10 herë. Për transaksionet deri në 40 mijë lekë, nuk do të ketë komision; për ato deri në 10 milion lekë do të aplikohet një komision prej 0.005%, dhe për më shumë se 10 milion lekë, komisioni do të jetë 10 euro.
Këto ndryshime pritet të krijojnë një ambient më të favorshëm për transaksionet financiare në vend, duke rritur kështu efektivitetin ekonomik dhe lehtësinë e përdorimit të shërbimeve bankare.
